Userapi.com сайти фотосурати
10 июндан бошлаб Ўзбекистонда COVID-19 пандемияси сабаб фуқароларнинг мамлакатга киришига қўйилган чекловлар бекор қилинади. Бу ҳақда Коронавирусга қарши курашиш бўйича Республика махсус комиссияси томонидан қарор қабул қилинди, деб хабар беради Ўзбекистон Туризм ва маданий мерос вазирлиги матбуот хизмати.
«Комиссия Ўзбекистонда коронавируснинг тарқалиш динамикаси, касалхонага ётқизилган ва чиқарилган беморлар сони, карантинга олинган фуқаролар сонининг ижобий ўзгариши, шунингдек, республикадаги эпидемиологик вазият, ЖССТ ва Туризм ва маданий мерос вазирлиги тавсияларини инобатга олди», — дейилади хабарда.
Чекловларнинг бекор қилиниши чегарани ҳаво йўллари, темир йўл вокзаллари ёки чегара ўтказиш пунктлари орқали кесиб ўтувчи ўзбекистонликлар, чет элликлар ва фуқаролиги бўлмаган шахсларга нисбатан қўлланилади.
Энди улардан коронавирус учун ПЦР тестининг салбий натижаси, тезкор антиген тести ва эмлаш сертификати ёки паспортини тақдим этиш талаб этилмайди.
Бугун Қозоғистон ҳам коронавирусга қарши чекловларни бекор қилди. 8 июндан бошлаб қозоғистонликлар ва хорижликлардан давлат чегарасини кесиб ўтишда ПЦР тести манфий ёки эмлаш паспорти талаб қилинмайди. Шу кундан бошлаб республиканинг етти вилоятидаги чегаранинг алоҳида участкаларида вақтинча ёпилган 12 та автомобиль ўтказиш пунктлари ўз фаолиятини тиклайди.
