Миразиз Базаров. Omct.org сайти фотосурати
20 январь куни эрталаб соат 11:00 да Жиноят ишлари бўйича Тошкент шаҳар Миробод тумани судида блогер Миразиз Базаров иши бўйича суд мажлиси бошланади. Бу ҳақда «Фарғона»га Ўзбекистон пойтахтидаги манба хабар берди.
Суд жараёни очиқ тарзда ўтказилади, Миробод туман суди раиси Сардорбек Содиқов судя этиб тайинланган.
Миразиз Базаров судда 2021 йил баҳорида қўзғатилган учта жиноий иш бўйича қатнашади. Бир ҳолатда унга нисбатан Ўзбекистон Жиноят кодексининг 139-моддаси 3-қисми «д» банди («Ғаразгўйлик ёки бошқа паст ниятларда туҳмат қилиш») билан айбланган. Яна иккита жиноий ишда у гувоҳ ва жабрланувчи сифатида иштирок этади. Апрель ойи охирида Базаров уй қамоғига олинган, июль ойида муддат сентябрь охиригача узайтирилган.
