Ўзбекистон ССВ матбуот хизмати фотосурати
7 январь куни Ўзбекистонда COVID-19 нинг янги штамми — «омикрон» аниқланди. Ушбу вирус мамлакатга ташриф буюрган чет эл фуқаросида аниқланган. Икки кундан сўнг COVID-19 га қарши кураш комиссияси республикада карантин чоралари кучайтирилганини маълум қилди, деб хабар қилади Соғлиқни сақлаш вазирлиги матбуот хизмати.
Жумладан, жамоат жойларида ҳимоя ниқобларини тақиш, ижтимоий масофани сақлаш ва шахсий гигиена қоидаларига риоя қилиш назорати кучайтирилмоқда.
Комиссия барча ташкилот, корхона, муассасалар, йирик савдо марказлари, супермаркетлар ва кўнгилочар масканлар раҳбарларини ходимлар ва ташриф буюрувчиларнинг кириш жойларида ниқоб тақиш, масофани сақлаш ва тана ҳароратини ўлчашни таъминлаш мажбуриятини юклади. Барча ходимлар эмланган бўлиши керак.
Мамлакатда эмлаш ишлари жадаллаштирилади. 24 январгача узайтирилган таътил кунларида эмланмаган ўқувчиларга эмланиш буюрилди. Ушбу талабни бажармаган талабалар учун олий ўқув юртлари раҳбарлари шахсан жавобгар бўлади.
Вазирликлар, идоралар, бошқа давлат тузилмалари ва хўжалик бирлашмаларига ҳар қандай тадбирларни ўтказиш тақиқланади.
15 январдан бошлаб Ўзбекистонга хориждан келганларнинг барчаси салбий натижага эга ПЦР тестини тақдим этиши шарт. Бундай сертификатга эга бўлмаган одамлар аэропорт, вокзал ёки чегара постида экспресс-тестдан ўтишлари мумкин бўлади.
Соғлиқни сақлаш вазирлигининг 9 январь маълумотларига кўра, Ўзбекистонда пандемия бошланганидан буён 200,7 мингта коронавирус инфекцияси қайд этилган. Сўнгги кунда 389 та ҳолат аниқланди. Инфекцияга энг кўп чалинганлик Тошкент шаҳрида (192), Тошкент вилоятида (51) ва Самарқандда (44) қайд этилган. Энг кам касалликка чалиниш Қорақалпоғистон ва Сурхондарё вилоятида қайд этилган, ҳар бирида биттадан ҳолат аниқланган.
COVID-19 қурбонлари сони 1497 нафарга етди.
