Москва вилоятининг Солнечногорск шаҳарчасида юз берган ёнғин оқибатида тўрт нафар ўзбекистонлик йигит ҳалоқ бўлган. Ташқи меҳнат миграцияси агентлиги (ТММА) матбуот хизмати ҳалок бўлганлар тўғрисида маълумот келтирган: Ш. А. (1969 йилда туғилган), Э. У. (1998), Ш. К. (1987), А. Р. (1998). Яна иккита одам жароҳат олган.
Россия Фавқулодда вазиятлар вазирлиги матбуот хизматининг хабарига кўра, 13 ноябрь соат
10:27 да Прибрежная кўчасида жойлашган қурувчиларнинг вақтинча турар жойида ёнғин юз бергани тўғрисида хабар келиб тушган. Ёнғинни ўчиришда 10 та техника ва 33 нафар ўт ўчирувчи иштирок этган. Ёнғин соат 15:40 да бутунлай ўчирилган.
Москва вилояти прокуратураси ёнғин муносабати билан текширув ишларини бошлаган. ТММА ҳалок бўлган юртдошлар жасадларини ватанга қайтариш чораларини кўрмоқда.
