Виктор Маҳмудов (чапда) Моид Юсуф (марказда) билан учрашувда, 1 ноябрь, Исломобод. Radio.gov.pk сайти фотосурати
Республика Хавфсизлик кенгаши котиби генерал-лейтенант Виктор Маҳмудов бошчилигидаги Ўзбекистон делегацияси 1 ноябрь куни уч кунлик ташриф билан Покистонга келди, деб хабар беради Radio Pakistan.
Маҳмудов Исломободда Покистон Бош вазирининг миллий хавфсизлик бўйича маслаҳатчиси Моид Юсуф билан учрашди. Хабарда учрашув тафсилотлари келтирилмаган. Шунингдек, Маҳмудов Бош вазир Имрон Хон ва Покистон армияси штаби бошлиғи генерал Қамар Жавед Баджва билан ҳам музокаралар олиб боради.
Ташриф давомида томонлар Покистон ва Ўзбекистон ўртасида хавфсизликка доир Қўшма комиссия тузиш бўйича келишув имзолайди ва комиссиянинг биринчи мажлисини ўтказади. Ўзбек делегацияси афғон-покистон чегарасидаги Торкхам (Torkham) назорат-ўтказиш пункти фаолияти билан танишади ва у ерда икки мамлакат ўртасида транспорт коридорини тузишга доир Ўзбекистон ташаббусига биноан Афғонистон орқали келган автомобиллар карвонини кутиб олади.
