President.uz сайти фотосурати
Беларусь президенти Александр Лукашенко Шавкат Мирзиёевни Ўзбекистон президентлигига ўтказилган сайловда эришган ғалабаси билан табриклади. Бу ҳақда БЕЛТА хабар беради.
Лукашенко Мирзиёевга кўзланган режаларни амалга оширишда муваффақиятлар тилаган. Томонлар алоқаларнинг изчил ривожланиб бораётганига урғу берган ҳолда, иккитомонлама муносабатлар билан боғлиқ масалаларни муҳокама қилганлар.
Хабарда Мирзиёевнинг табрикка муносабати тўғрисида ёзилмаган.
Бундан олдин Россия президенти Владимир Путин Мирзиёевни қўлга киритган ғалабаси билан табриклаган эди.
Бироқ, Ўзбекистон Марказий сайлов комиссияси 24 октябрда бўлиб ўтган сайловнинг дастлабки натижаларини ҳам ҳали эълон қилмади. Сайлов натижалари 25 октябрь кунининг иккинчи ярмида эълон қилиниши кутилмоқда.
Дастлабки маълумотларга кўра, Ўзбекистон Республикаси Президенти сайловида иштирок этганлар сони сайловчиларнинг 80,8 фоизини ташкил этган.
