Остон Урунов. Wikipedia.org сайтидан Дмитрий Пукалик фотосурати
Ўзбекистон футбол терма жамоаси ярим ҳимоячиси ва россияликларнинг «Уфа» клуби ўйинчиси Остон Урунов билан москваликлар «Спартак»и ва «Локомотив»и, шунингдек, питерликларнинг «Зенит» клублари қизиқиб қолган. Бу ҳақда Sport24 нашри хабар беради.
Уруновнинг «Спартак» клубига ўтиши эҳтимоли бор, зеро уни ҳозирда «Уфа»нинг собиқ бошлиғи Шамиль Газизов бошқармоқда ва айнан у ўйинчининг трансфери билан шуғулланади.
19 ёшли футболчига, шунингдек, «Краснодар» клуби ҳам таклиф киритиши мумкин, чунки Урунов узоқ пайт ушбу клубда стажировка ўтаган.
Бу мавсумда ўзбек футболчиси уфаликлар шарафини ёқлаб тўққизта матчда иштирок этди. 28 та мусобақадан сўнг ушбу жамоа 37 та очко билан Россия Премьер лигаси турнир жадвалинининг олтинчи ўрнини эгаллаган.
Остон Урунов – ўнг қанот ярим ҳимоячиси ҳисобланади, «Пахтакор» клубида тарбия топган. У 2017 йили наманганликларнинг «Навбаҳор» жамоасида тўп сурди. 2019 йили тошкентликларнинг «Локомотив» клуби билан шартнома имзолади ва ушбу жамоа билан Суперлигада кумуш совринини қўлга киритди. Жорий йилнинг январь ойида футболчини «Уфа» клуби $150 мингга сотиб олди. Урунов Ўзбекистон миллий футбол жамоаси сафида учта матчда иштирок этган. Ёш футболчи 900 минг еврога баҳоланади.
