Отабек Умаров. @otabek_muhammadalievich Instagramи фотосурати
Ўзбекистон ММА федерацияси президенти Отабек Умаров Марказий Осиё аралаш жанг санъати конфедерациясига (ММА) раҳбар этиб тайинланди. Бу ҳақда Vesti.kz хабар беради.
Марказий Осиё ММА конфедерациясини тузиш қарори Нур-Султонда бўлиб ўтган Халқаро аралаш жанг санъатлари федерацияси (IMMAF) кенгашида қабул қилинди. Янги ташкилот таркибида Озарбайжон, Қозоғистон, Қирғизистон, Тожикистон ва Ўзбекистон курашчилари жанг олиб борадилар.
Конфедерация президентининг ўринбосарлари этиб IMMAF директорлар кенгаши аъзоси Искандер Карим ва Қозоғистон ММА бирлашган федерацияси бош директори Валихан Тен тайинланди.
Конфедерациянинг қароргоҳи Ўзбекистонда жойлашади.
Шунингдек, кенгашда ММА бўйича Осиё чемпионатини шу йилнинг июнь ойида Нур-Султонда ўтказиш бўйича қарор қабул қилинди.
Отабек Умаров Ўзбекистон президенти Шавкат Мирзиёевнинг кичик куёви бўлиб, жумладан у президент хавфсизлик хизмати бошлиғининг ўринбосари, республика Триатлон федерациясининг раҳбари ҳисобланади.
