depositphotos.com сайти фотосурати
Каспий қувур консорциуми (КҚК) Қора денгизидаги денгиз терминали ёнида нефть юклаш ишларини амалга ошираётган танкерга учувчисиз учиш аппарати орқали янги ҳужум уюштирилгани ҳақида хабар берди.
Консорциум маълумотларига кўра, ҳодиса 20 июль куни, яъни аввалги ҳужумдан бир кун ўтиб содир бўлган. Ҳужум NELSA танкерига уюштирилган бўлиб, кема ВПУ-1 ташқи причал қурилмаси ёнида турган бўлган. Дрон танкернинг ўнг борти орқа қисмига, устқурилма ва машина-қозонхона бўлими оралиғига келиб тушгани натижасида ёнғин чиққан.
Ёнғин бир неча соат ичида экипаж ва КҚКнинг авария-қутқарув бўлинмалари томонидан ўчирилган. 22 кишидан иборат халқаро экипаж консорциум буксирлари ёрдамида эвакуация қилинган. Кема бортида капитан ва катта ёрдамчи қолган. КҚК маълумотларига кўра, танкер ўзининг сузиш қобилиятини сақлаб қолган.
Ҳодисадан сўнг нефть юклаш ишлари яна тўхтатилган. Нефть тўкилишининг ва танкер резервуарларидаги юкнинг ёниб кетишининг олди олинган.
КҚК таъкидлашича, ҳужум Қозоғистон Ташқи ишлар вазирлиги ва Энергетика вазирлиги фуқаролик кемаларига қилинган аввалги зарбаларни қоралаб, уларни республика иқтисодий манфаатларига тажовуз деб атаган баёнотларидан кўп ўтмай содир бўлган.
«КҚК иштирокчи давлатлари мазкур ҳужумларни қоралайди ва халқаро ҳуқуқ меъёрларига сўзсиз риоя қилган ҳолда Қозоғистон Республикаси ҳудудида халқаро консорциумлар томонидан қазиб олинган углеводород хом ашёсини экспорт қилиш инфратузилмасига нисбатан террорчи ҳужумларни тўхтатиш бўйича амалий чораларни ишлаб чиқади, деб кутмоқдамиз», — дея таъкидланади консорциум матбуот хизматида.
Каспий қувур консорциуми Қозоғистон нефтини жаҳон бозорларига экспорт қилишнинг асосий йўналиши ҳисобланади: мамлакат нефть экспортининг 80 фоиздан ортиғи унинг тизими орқали амалга оширилади. Тахминан 1,5 минг километр узунликдаги қувур Ғарбий Қозоғистондаги нефть конларини Қора денгиз соҳилидаги (Новороссийск яқинида жойлашган) денгиз терминали билан боғлайди. У ердан нефть танкерларга юкланиб, жаҳон бозорларига жўнатилади. Консорциум акциядорлари орасида Россия, Қозоғистон, АҚШнинг Chevron компанияси ва бошқа халқаро нефть-газ корпорациялари бор.
