zumapress.com фотосурати
Эроннинг собиқ президенти Маҳмуд Аҳмадинажоднинг офиси унинг Исроил махсус хизматларининг махфий операциясига алоқадорлиги ҳақидаги The New York Times нашри хабарига рад жавобини берди. Бу ҳақда The New York Times (NYT) Аҳмадинажоднинг ижтимоий тармоқлардаги саҳифасида эълон қилинган баёнотга таяниб хабар қилди.
Нашрнинг 13 июль куни эълон қилинган суриштирувида америкалик ва эронлик амалдорларга таяниб айтилишича, Исроил Маҳмуд Аҳмадинажодни Эроннинг янги раҳбари сифатида ҳокимиятга олиб келиш бўйича кўп йиллик режа ишлаб чиққан. Унда таъкидланишича, операция доирасида Исроил махсус хизматлари Венгрияда ўтказилган иқлим ўзгаришига бағишланган конференциядан собиқ президент билан махфий учрашувлар учун ниқоб сифатида фойдаланишни режалаштирган.
NYT ёзишича, Исроил махсус хизматлари Аҳмадинажод билан илк бор 2023 йилда унинг Гватемалага ташрифи чоғида алоқа ўрнатган. 2024 йилда Эроннинг собиқ президенти Людовика номидаги Давлат хизмати университетининг таклифига биноан Будапештга борган ва у ерда ўша пайтдаги «Моссад» раҳбари Давид Барнеа билан учрашган. Исроил разведкаси Аҳмадинажод билан бўлган алоқалари ҳақида АҚШ Марказий разведка бошқармаси (МРБ)ни хабардор қилиб борган.
Нашр маълумотига кўра, 2025 йили Аҳмадинажод яна Будапештга ташриф буюрган. Таъкидланишича, бу сафар давомида унинг Ислом инқилоби қўриқчилари корпуси (ИИҚК) таркибидаги қўриқчилари тайёрлаган ҳисоботга кўра, собиқ президент камида икки марта қўриқчилар ҳамроҳлигидан чиқиб кетган ва қўриқчиларга номаълум бўлган жойларда узоқ давом этган учрашувлар ўтказган. Аҳмадинажод бу ҳолатга изоҳ берар экан, университет профессорлари билан учрашганини айтган.
Газета талқинига кўра, операциянинг энг юқори нуқтаси 2026 йил 28 февраль куни унинг қароргоҳига уюштирилган ҳаво зарбасидан сўнг Аҳмадинажодни эвакуация қилишга бўлган уриниш бўлган. Нашрнинг ёзишича, ўша куни собиқ президент қора рангли Peugeot автомобилида катта тезликда олиб кетилган. Хавфсиз жойга етиб боргач, Аҳмадинажод уни яна ҳокимиятга қайтариш режасидан кўнгли қолган ва яшириниш жойини тарк этган.
Собиқ президент 6 июлга қадар жамоатчилик олдида кўриниш бермаган. Шу куни у Эроннинг ҳалок бўлган олий раҳбари Али Хоманаийнинг жаноза маросимида қисқа муддатга иштирок этган. Мақолада қайд этилишича, Аҳмадинажод бошини эгган ҳолда, эҳтимол қўриқчилари бўлган одамлар қуршовида турган. Унинг ҳозирги мақоми эса ҳамон ноаниқлигича қолмоқда.
Эроннинг тўрт нафар юқори лавозимли амалдори NYT нашрига маълум қилишича, Аҳмадинажод Ислом инқилоби қўриқчилари корпуси (ИИҚК) разведка бўлинмаси назоратида уй қамоғида сақланмоқда.
Аҳмадинажод офиси баёнотида эса бу маълумотлар тўлиқ рад этилган.
«The New York Times тарқатаётган мутлақо ёлғон барча иддаоларни қатъий равишда рад этамиз», — дейилади баёнотда.
Баёнот муаллифлари таъкидлашича, мазкур нашрнинг мақсади собиқ президентнинг омма орасидаги нуфузига путур етказиш бўлиб, у ҳарбий таҳдидлар туфайли юзага келган нозик сиёсий вазиятдан фойдаланмоқда. Газета келтирган иддаолар «Голливудча уйдирмалар» ҳамда Эрон жамиятига қарши олиб борилаётган психологик урушнинг бир кўриниши деб баҳоланган.
Раддияда айниқса уй қамоғи ҳақидаги маълумотга алоҳида эътибор қаратилган. Баёнотда Аҳмадинажод ҳибсда экани инкор этилиб, у одатдагидек кундалик фаолиятини давом эттираётгани таъкидланган.
Бунга жавобан NYT вакили Николь Тейлор собиқ президент офиси жамоатчилик фикрини манипуляция қилиш мақсадида «ўта ёлғон айбловлар»ни илгари сурганини айтган. Унинг таъкидлашича, 13 июль куни эълон қилинган эксклюзив материал ишончли манбалар билан ишлаган мухбирлар жамоаси меҳнати натижаси бўлиб, айнан улар АҚШ ва Исроил ҳокимият алмашинуви доирасида Аҳмадинажодни Эрон раҳбари лавозимига тайёрлаётгани ҳақида биринчи бўлиб хабар берган. Газета вакили нашр ўз репортажида келтирилган маълумотларнинг ишончлилигига тўлиқ ишонишини қўшимча қилди.
Аҳмадинажод 2005–2013 йиллари Эрон президенти лавозимида фаолият юритган ва Исроилга қарши кескин баёнотлари, жумладан, «Исроилни дунё харитасидан ўчириб ташлаш» ҳақидаги таҳдидли сўзлари билан танилган. Бироқ, NYT қайд этишича, сўнгги йилларда у Ислом Республикаси раҳбарияти билан бир неча бор келишмовчиликка бориб, уни коррупцияда айблаган ҳамда Исроилга нисбатан билдирган баёнотларини анча юмшатган.
