Қамчибек Ташиев. sputnik.kg сайти фотосурати
10 февраль куни истеъфога чиққан Қирғизистон Миллий хавфсизлик давлат қўмитаси (МХДҚ) раҳбари ва Бош вазир ўринбосари Қамчибек Ташиев баёнот берди, унинг матни «Регион ТВ» томонидан эълон қилинди.
«Соғлиғим ёмонлашгани сабабли, президентнинг рухсати билан мен аввали операция қилинган жойда тиббий кўрикдан ўтиш учун Германияга келдим. Бироқ, кеча лавозимимдан озод қилинганимни билдим. Бу мен учун мутлақо кутилмаган ҳолат бўлди.
Ҳар қандай вазиятдан қатъи назар, биз президент қарорини амалга оширишга мажбурмиз.
Мен давлатга, халққа ва президентга ҳалоллик ва фидойилик билан хизмат қилдим ва бундан фахрланаман. Ягона афсус қиладиган жойим шундаки, мен шахсий таркиб билан шахсан хайрлаша олмадим.
Мен ҳар бир МХДҚ ходимига миннатдорчилик билдираман ва уларга хизматларида муваффақиятлар тилайман.
Сизларни шунга чорлайман: мамлакатимиздаги тинчлик ва барқарорлик учун ҳеч ким ноқонуний ҳаракатларга қўл урмаслиги керак. Барча ҳаракатларимиз қатъий қонун доирасида бўлиши керак», — дейилади Ташиев баёнотида (Akipress томонидан таржима қилинган).
ℹ️ 2026 йил 10 февралда Қирғизистон президенти Садир Жапаров Қамчибек Ташиевни Бош вазир ўринбосари ва Миллий хавфсизлик давлат қўмитаси раҳбари лавозимидан озод қилди. Кейинчалик махсус хизмат раисининг барча ўринбосарлари ишдан бўшатилди ва уларнинг ўрнига янги одамлар тайинланди. Бундан ташқари, президент юқори лавозимли амалдорлар ва муҳим объектларни ҳимоя қилишни МХДҚ тасарруфидан чиқарди ва Давлат хавфсизлик хизматига ўтказди ва уни тўғридан-тўғри ўз назоратига олди. Чегара хизмати ҳам алоҳида ташкилотга айланди.
