Хулбуқ қалъаси. asiaplustj.info сайти фотосурати
Кейинги пайтларда Тожикистонда 120 та янги тарихий ва маданий мерос объектлари топилди. Ҳозирда мамлакатда 3500 дан ортиқ шундай ёдгорликлар мавжуд. Бу ҳақда Республика ҳукумати ҳузуридаги Тарихий ва маданий меросни асраш агентлиги директори Шерали Хўжазода журналистлар билан учрашувда маълум қилди, деб хабар беради «Азия-Плюс» нашри.
Шунингдек, мулозим ўз агентлиги томонидан назорат қилинадиган аниқ лойиҳаларни ҳам таъкидлади. Масалан, Турсунзодадаги Хўжа Нақшрони ва Панжакентдаги Муҳаммад Башор ёдгорликларида тиклаш ишлари якунланган. Хатлон вилоятидаги Мўминобод қалъасини тиклаш ишлари ҳали ҳам давом этмоқда.
Хўжазоданинг қўшимча қилишича, президент Эмомали Раҳмоннинг кўрсатмаси билан Бохтардаги яқинда топилган Бибихонум ёдгорлигида археологик қазишмалар олиб борилган. Бундан ташқари, мустақил Тожикистон тарихида биринчи марта мутахассислар Хулбуқда (Хатлон вилоятидаги археологик мажмуа – «Фарғона» изоҳи) шунга ўхшаш ишларни амалга оширдилар.
Натижада мутахассислар 190 дан ортиқ артефактларни, жумладан, заргарлик буюмлари, нумизматика, шиша буюмлар, кулолчилик буюмлари, муҳрлар ва эпиграфик мерос намуналарини топганлар. Дарвоқе, агентлик директори таъкидлашича, ўзлаштирилган бир гектарлик ер участкасида Хулбуқ археологик базаси ташкил этилади.
Умуман олганда, агентлик архивлари 220 та жой паспорти билан кенгайтирилди ва кутубхонага мамлакатнинг етакчи олимлари томонидан совға қилинган 1500 дан ортиқ илмий ва бадиий адабиётлар нусхалари топширилди.
Матбуот анжуманида мамлакат сентябрь ойида нишонлайдиган Тожикистон мустақиллигининг 35 йиллигига бағишланган лойиҳалар мавзуси алоҳида кўтарилди. Масалан, ҳозирда Истаравшон давлат этнология институти учун икки қаватли бино ва маҳаллий тадбиркорлар иштирокида «Археологик база» қурилиши давом этмоқда. Ҳисордаги Тарихий ва маданий мерос давлат муассасаси учун маъмурий бино лойиҳаси якунланган. Унинг қурилиши байрамга режалаштирилган.
