Истанбулдаги акция. Turkish minute сайти фотосурати
Истанбул ва Анқарада 37 ёшли ўзбек аёлининг боши кесилган жасади ахлат қутисидан топилганидан кейин норозилик намойишлари бўлиб ўтди. Бу ҳақда 25 январь куни Turkish minute нашри хабар берди.
Аёлнинг бошсиз ва оёқсиз жасади 24 январь куни кечқурун Истанбулнинг Европа қисмидаги Шишли туманида макулатура йиғувчи одам томонидан топилган. Жасад қолдиқлари чойшабга ўралган ва ахлат қутисига ташланган. Жабрланувчининг боши ва оёқлари топилмаган. Терговчилар видеокузатув камералари тасвирларини кўриб чиқаётганда, икки киши чамадонни бошқа ахлат қутисига ташлаётганини кузатганлар. Чамадон ичидаги нарсалар ҳали аниқланмаган.
Терговчилар жабрланувчи Истанбулда яшаб, ишлаган, ов анжомлари дўконига эгалик қилган 37 ёшли Ўзбекистон фуқароси Дурдона Ҳакимова эканини аниқлаганлар.
Полиция уч нафар гумонланувчини ҳибсга олган. Ўзбекистон фуқаролари деб танилган икки гумонланувчи Истанбул аэропортида мамлакатдан чиқиб кетишга уринаётганда қўлга олинган. Учинчи гумондор, Туркия фуқароси, кейинчалик ҳибсга олинган.
ОАВ ҳибсга олинганларнинг исмларини ошкор қилади: 31 ёшли Дилшод Турдимуротов, 29 ёшли Ғофуржон Камолхўжаев ва 58 ёшли Экрем К.
Қотилликда гумонланувчи шахслар Истанбул полициясида. Turkiye Daily сайти фотосурати
Турдимуротов полицияга Хакимова билан муносабатда бўлганини ва жанжал пайтида уни ўлдирганини айтган.
«Мен уни пичоқладим. Кейинроқ дўстим билан жасадни бўлакларга бўлиб ташладик, тана қисмларини пакетларга солиб, чамадонга солдик. Биз Шишлига таксида бордик ва тана бўлакларини турли ахлат қутиларига ташладик», — дея жиноятчи сўзларини келтиради Turkiye Today.
Қотиллик Истанбул ва Анқарада оммавий норозилик намойишларига сабаб бўлди. Истанбулда мингдан ортиқ одам Шишли туманидаги «Османбей» метро бекати ёнида тўпланди. Намойишчилар «Эркаклар зўравонлигини тўхтатинг», «Биз ўлдирилган аёллар учун адолат талаб қиламиз» ва «Мигрант аёллар ёлғиз эмас» деган талаблар қўйилган плакатларни кўтариб юришган. «Аёллар энди жим бўлмайди» шиори биланган намойишчилар жасад топилган жойга юриш қилган.
Анқарада «Биз фемицидларни (жинсий адоватга асосланган жиноят, қотиллик -тарж.изоҳи) тўхтатамиз» платформаси томонидан ташкил этилган норозилик намойиши бўлиб ўтди ва унда жиноятчилар жавобгарликка тортилиши талаб қилинган.
«Жиноятчилар ўзларига ҳеч нарса бўлмаслигига шунчалик ишонишганки, ўлдирилган аёл жасадини кўринадиган жойга контейнерда қолдириб кетишган», — дейди платформа вакили Ишил Курт.
«Биз фемицидларни тўхтатамиз» платформасига кўра, 2025 йили Туркияда 294 аёл эркаклар томонидан ўлдирилган. Яна 297 аёл шубҳали шароитларда ўлик ҳолда топилган. Туркияда аёллар ўлдирилганига оид умуммиллий статистика расман эълон қилинмайди, шунинг учун аёллар ташкилотлари бунга оид воқеаларни оммавий ахборот воситалари хабарларига асосланиб кузатиб боради.
Ҳибсда бўлган Шишли тумани ҳокими Расул Эмраҳ Шаҳан фемицидларни «жиддий ижтимоий муаммо» деб атади.
«Фемицидлар жазосизлик, бепарволик ва сукут туфайли тобора кенг тарқалган қирғинга айланиб бормоқда», — деб ёзади Шаҳан Х ижтимоий тармоқ сайтида. У аёлларга нисбатан зўравонликка қарши курашиш учун мувофиқлаштирилган чоралар кўришга чақиради.
