Ўтган йили Дональд Трамп расман Қўшма Штатлар президенти бўлганидан ва ноқонуний миграцияга қарши курашни кучайтирганидан бери, салкам 700 нафар Ўзбекистон фуқароси Ўзбекистонга қайтиб келди. Календарь йили давомида икки мамлакат дипломатлари АҚШдан Тошкентга 11 та депортация рейсини ташкил қилишди, деб хабар беради «Газета.uz» нашри «Дунё» ахборот агентлиги хабарига таяниб.
Ўтган ҳафта 11-чи депортация рейси амалга оширилгани маълум қилинди. Ушбу рейсда 44 нафар ўзбекистонлик уйга қайтган. Уларнинг узоқ йўл босишига тўғри келган — ватандошлар 24 соатдан ортиқ парвоз қилишган, йўлда бир нечта қўнишлар амалга оширилган, жумладан, Арманистон ва Руминия аеропортларида.
Дипломатларнинг аниқлик киритишича, кўплаб ўзбекистонликлар АҚШ чегарасини ноқонуний кесиб ўтишга урингани учун узоқ вақт давомида АҚШ иммиграция ҳибсхоналарида ушлаб турилган.
Уйга қайтган ёшлардан бирининг сўзларига кўра, у АҚШга «қизиқувчанлик ва бошқаларнинг ҳикоялари таъсирида» йўл олган. Харажатлар 23 минг долларни ташкил этган, орада 80 минг доллар сарфлаганлар ҳам бўлган.
У Ўзбекистондан Мексикагача қарийб бир ой давомида етиб борган. Йўлнинг энг қийин қисми Мексикадаги ўрмонлар ва кимсасиз йўлаклар орқали ўтган ҳудуд бўлган. Америкага етиб боргач, уни дарҳол вақтинчалик сақлаш маркази олиб боришган ва ўзбекистонлик йигит бу ерда уч ой ўтирган.
«Баъзи одамлар бундай марказларда йиллаб қолиб кетишмоқда. Бу инсонни маънавий ва жисмоний жиҳатдан синдирадиган оғир синовдир. Дўстлари ёки танишлари „жуда катта пул топяпмиз“ деб у ерга чорлаётганларга маслаҳатим: уларга ишонманг. Реал ҳаёт бутунлай бошқача. Ҳатто Мексика орқали у ерга етиб борган тақдирингизда ҳам, иш топиш, ҳужжатларни расмийлаштириш ва шунчаки ҳаётни йўлга қўйиш ҳаддан ташқари қийин», — дейди мигрант.
Ахборот агентлигининг хабар беришича, Тошкентга қайтган ўзбекистонликлар Ўзбекистон ҳукуматига уларни ватанига қайтаришда кўрсатган ёрдами учун миннатдорчилик билдиришган.
«Дунё» кейинроқ АҚШдаги Ўзбекистон элчихонаси ходимлари Виржиния штатидаги Кэролайн ва Фармвилл вақтинчалик сақлаш марказларига ташриф буюрганини хабар қилди. Дипломатлар панжара ортидаги ватандошлари билан учрашиб, уларнинг соғлиғи, озиқ-овқати ва бошқа яшаш шароитларини ўрганиб чиққанлар.
Мигрантлар Қўшма Штатларга ноқонуний кирганликлари учун ҳибсга олинганини ва уларнинг аксариятига нисбатан депортация ишлари олиб борилаётганини айтишган. Ўзбекистонликлар дипломатлардан ватанга тезроқ қайтишлари учун ёрдам беришларини сўрашган.
Ўз навбатида, элчихона ходимлари АҚШ иммиграция сиёсатидаги ўзгаришларни ҳисобга олган ҳолда, Марказий Осиё республикасининг хориждаги фуқароларига борган мамлакатларида қонуний яшаш ва маҳаллий қонунларга қатъий риоя қилишни қатъий тавсия қилишади.
