Тенгиздаги ёнғин 18.01.2026. Видеодан скриншот
Қозоғистондаги Тенгиз ва Қироллик конларида нефть қазиб олиш электр таъминоти билан боғлиқ муаммолар туфайли вақтинча тўхтатилди, деб хабар беради Reuters агентлиги конларнинг оператори — «Тенгизшевройл» (ТШО) га таяниб.
«ТШО эҳтиёт чораси сифатида компания Тенгиз ва Қироллик нефть конларида ишлаб чиқаришни вақтинча тўхтатганини тасдиқлайди», — дейилади баёнотда. Ишлаб чиқаришни тўхтатиб туриш «объектдаги баъзи электр тақсимот тизимларига таъсир кўрсатган муаммо» билан боғлиқ.
Аввалроқ, давлатга қарашли «КазМунайгаз» компанияси 18 январь куни эрталаб Тенгиздаги ГТЭС-4 даги GT-9.3 турбина трансформаторида ёнғин содир бўлганини, ундан кейин ГТЭС-4 да GT-9.5 трансформаторида ёнғин содир бўлганини хабар қилганди. Иккала ёнғин ҳам ўчирилган ва ҳеч ким жабрланмаган. Ҳодисалар сабаби ҳозирда аниқланмоқда.
Тенгиз — Қозоғистоннинг энг йирик нефть ва газ кони бўлиб, Атирау вилоятида, Атирау шаҳридан 350 километр жануби-шарқда жойлашган. Қироллик кони Тенгиз билан туташган ҳолда, шимоли-шарқдан 20 километр узоқликда жойлашган. Иккала кон ҳам «Тенгизшевройл» томонидан бошқарилади. Бу компаниянинг 50% Chevron, 25% Exxon Mobil, 20% «КазМунайгаз» («Самрук-Казина» шўъба корхонаси) ва 5% Россиянинг «Лукойл»ига тегишли.
Тенгиз ва Қироллик конларининг нефть захиралари 1,4 миллиард тоннани ёки 11,5 миллиард баррелни ташкил этади. «Тенгизшевройл» ўзининг асосий маҳсулот ҳажмини Каспий қувурлари консорсиуми (КҚК) орқали экспорт қилади, аммо Южная Озереевкадаги (Новороссийск яқинидаги) денгиз терминали инфратузилмасига етказилган зарар туфайли хомашёнинг бир қисми энди Боку-Тбилиси-Жейҳан нефть қувурига ва «Дружба» нефть қувури орқали Германияга йўналтирилмоқда.
