akorda.kz сайти фотосурати
АҚШ президенти Дональд Трамп қозоғистонлик ҳамкасби Қосим-Жомарт Тўқаевни Ғазо секторини бошқарадиган «Тинчлик кенгаши»га қўшилишга ва Қозоғистонни муассис давлатлардан бири бўлишга таклиф қилди. Бу ҳақда Қозоғистон раҳбарининг матбуот котиби Руслан Желдибай Tengrinews.kz нашрига маълум қилди.
Унинг сўзларига кўра, Тўқаев таклифни қабул қилган.
«Бир қадор давлат етакчилари берган баёнотларидан сўнг президент Дональд Трампдан бундай расмий сўров олганлик фактини яшириш нотўғри бўлган бўларди. Ҳа, Президент Қосим-Жомарт Тўқаев «Тинчлик кенгаши»га қўшилиш учун расмий таклифнома олган биринчи дунё етакчиларидан бири бўлди ва Қозоғистон муассис давлатлардан бири бўлишга таклиф қилинди. Бунга жавобан давлат раҳбари АҚШ президентига самимий миннатдорчилик билдирди ва ушбу янги ташкилотга қўшилишга розилигини тасдиқлаган мактуб юборди. Президент Қозоғистоннинг Яқин Шарқда мустаҳкам тинчликка эришиш, давлатлараро ишончни мустаҳкамлаш ва глобал барқарорликка муҳим ҳисса қўшишга содиқлигини яна бир бор тасдиқлади», — деди Желдибай.
Трамп 2026 йил 16 январда «Тинчлик кенгаши» ташкил этилганини эълон қилди. Ушбу ташкилотнинг ташкил этилиши АҚШ президентининг Ғазо учун тинчлик режасини бир қисми бўлиб, халқаро кучларни жойлаштириш билан бирга амалга оширилди. Шу куни Кенгашнинг биринчи ижроия қўмитаси тузилгани эълон қилинди. Унинг аъзолари орасида АҚШ Давлат котиби Марко Рубио, Трампнинг махсус вакили Стив Уиткофф, АҚШ президентининг куёви ва инвестор Жаред Кушнер, Буюк Британиянинг собиқ Бош вазири Тони Блэр,Жаҳон банки бош директори Ажай Банга ва АҚШ миллий хавфсизлик бўйича маслаҳатчиси ўринбосари Роберт Габриел бор.
Бир кун олдин, Bloomberg ташкилот низом лойиҳасини кўриб чиқиб, Трамп Кенгаш раиси бўлишини ва у кенгашга аъзо сифатида кимни таклиф қилиш борасида ягона қарор қабул қилувчи шахс бўлишини хабар қилди. Қарорлар кўпчилик овоз билан қабул қилинади, аммо якуний тасдиқлаш раисга тегишли бўлади.
Лойиҳада шунингдек, кенгаш аъзолиги муддати уч йилдан ошмаслиги белгиланган. Ташкилотда доимий ўринни эгаллашни истаган давлатлар камида 1 миллиард доллар ҳисса қўшишлари лозим.
Низомда кенгаш «барқарорликни ривожлантиришга, соғлом ва қонуний бошқарувни тиклашга ва можаролар домида ёки таҳдид остида бўлган минтақаларда узоқ муддатли тинчликни таъминлашга интиладиган халқаро ташкилот» сифатида таърифланган. Кенгаш учта аъзо давлат унинг низомини тасдиқлаганидан сўнг расмий органга айланади.
