Дональд Трамп. cbsnews.com сайти фотосурати
АҚШ президенти Дональд Трамп агар Ислом Республикаси ҳукумати аксилҳукумат намойишчиларини дорга осишни бошласа, Эронга қарши «жуда қатъий чоралар кўриш» билан таҳдид қилди, деб хабар беради CBS News телеканали.
Америка раҳбари 13 январь куни кечқурун Мичиган штатининг Дирборн шаҳрида «Си-би-Эс кечки янгиликлари» дастурини бошловчиси Тони Докоупил билан эксклюзив интервьюсида шундай таҳдидни тилга олди.
«Биз жуда қатъий чоралар кўрамиз. Агар улар шундай қилсалар, биз жуда қатъий чоралар кўрамиз», — деди Трамп. Унинг айтишича, икки ҳафтадан ортиқ давом этган намойишларда «жуда кўп» одамлар ҳалок бўлганидан у хабардор.
Турли манбаларга кўра, Эрондаги оммавий норозилик намойишлари пайтида камида 2500 киши ҳалок бўлган деб тахмин қилинмоқда, бундан ташқари, 12 000 дан 20 000 гача бўлган катта рақамлар ҳам келтирилмоқда.
Трамп илгари ижтимоий тармоқларда Эрон расмийлари ҳар қандай зўравонлик учун «катта товон тўлаши» борасида огоҳлантирган эди. У Эрон фуқароларига «ЁРДАМ ЙЎЛДА» дея ваъда берган ва уларни норозилик намойишларини давом эттиришга чақирган эди. АҚШ президенти қотилликлар тўхтатилмагунча Эрон расмийлари билан учрашмаслигини айтди.
CBS телеканалига берган интервьюсида Трамп Эрон фуқаролари учун «катта ёрдам йўлда» эканини яна бир бор таъкидлади. Унинг сўзларига кўра, бу ёрдам «турли шаклларда» бўлади, жумладан, иқтисодий ёрдам сифатида. Президент ўтган йили АҚШнинг Эроннинг учта ядровий иншоотига қилган ҳаво ҳужумларини эслатиб ўтди, аммо бошқа тафсилотларни келтирмади.
Эрондаги мақсади нима экани сўралганда, Трамп шундай жавоб берди: «Мақсад — ғалаба қозониш. Мен ғалаба қозонишни яхши кўраман».
У ўзининг биринчи ва иккинчи президентлик муддатлари давомида ўтказилган ҳарбий операцияларни санаб ўтди. Буларга Венесуэла етакчиси Николас Мадуронинг яқинда қўлга олиниши, 2019 йили Сурияда тақиқланган террористик ташкилот «Ислом давлати» (ИД) асосчиси Абу Бакр ал-Бағдодий ўлими билан якунланган рейд ва 2020 йили Эроннинг элит Қудс кучлари раҳбари Қосим Сулаймонийнинг ўлдирилиши киради.
«Биз Эронда содир бўлаётган воқеалар содир бўлишини истамаймиз. Биласизми, агар улар норозилик намойишларини уюштиришни хоҳласалар, бу бошқа масала. Улар минглаб одамларни ўлдира бошласалар, энди сиз менга дорга осишларини гапиряпсиз – кўрамиз, бу улар учун нима билан якунланади. Бундан ҳеч қандай яхшиликни кутиб бўлмайди», — деди Америка президенти.
Аввалроқ, Трамп Вашингтон Эрон ҳукумати ҳаракатларига жавобан «жуда кучли вариантлар»ни кўриб чиқаётганини айтган эди. Булар ҳарбий зарбалар, махфий киберқуроллардан фойдаланиш, санкцияларни кенгайтириш ва ҳукуматга қарши манбаларга онлайн ёрдам кўрсатишни ўз ичига олади.
Ўз навбатида, Эрон парламенти спикери Муҳаммад Бағир Ғолибаф Вашингтонни «агар Эронга ҳужум қилинса, босиб олинган ҳудудлар (Исроил), шунингдек, барча АҚШ базалари ва кемалари бизнинг қонуний нишонларимизга айланади» дея огоҳлантирди.
Бунга жавобан Трамп Эронга жиддий оқибатларни ваъда қилди. «Агар улар бу ишни қилсалар, биз уларга илгари ҳеч қачон дуч келмаган зарбани берамиз. Менда жуда кучли вариантлар бор. Агар улар буни қилсалар, улар жуда катта кучга дуч келишади», — деди АҚШ президенти.
