tass.ru сайти фотосурати
Nestle Food компанияси Ўзбекистонда чақалоқлар учун мўлжалланган сут аралашмаларининг айрим партияларини ихтиёрий равишда қайтариб олмоқда. Гап тез тайёрланадиган қуруқ сутли ва ферментланган сут аралашмалари маҳсулотлари ҳақида бормоқда. Ушбу ҳаракат ташқи етказиб берувчи хом ашёси таркибида цереулид токсинининг потенциал хавфи аниқлангани сабабли амалга оширилмоқда, дейилади компанияси Telegram-каналида берилган баёнотда.
Унда яқин орада савдо пештахталаридан қайтариб олинадиган маҳсулотларнинг аниқ партияси келтирилган. Қуйидаги брендлар қайтариб олинади: NAN 1 OPTIPRO, NAN 2 OPTIPRO, NAN қатиғи, NAN Supreme ва ALFARE Amino.
Компаниянинг аниқлик киритишича, хавфли модданинг минимал миқдори ва Ўзбекистонда озиқ-овқат маҳсулотларида цереулид токсинлари даражасини меъёрлаш нормаси йўқлигига қарамай, Nestle жорий йилнинг 5 январидан Марказий Осиё республикасида чекланган миқдорда чақалоқлар учун мўлжалланган сут аралашмаларини қайтариб олишни бошлаган.
Nestle Food хориж компанияси регуляторни хабардор қилган ва давлат идоралари ва истеъмолчиларга Ўзбекистон бозорида кўрилаётган чоралар ҳақида зарур маълумотларни тақдим этишга тайёр. Илгари токсинни ўз ичига олиши мумкин бўлган маҳсулотларни сотиб олган мижозлар уларни компания тартиб-қоидаларига мувофиқ қайтариб топширишлари мумкин.
Қайтариб олинаётган маҳсулотлар болалар озиқ-оқатининг чекланган миқдорини қамраб олиши таъкидланган. Шунинг учун Nestleнинг бошқа озиқ-овқат маҳсулотлари Ўзбекистон дўконлари пештахталарида қолаверади.
Бундан олдин Nestle Қозоғистонда чақалоқлар учун сут аралашмаларини қайтариб олишини эълон қилганди. Бу ерда ҳам маҳсулотнинг бир нечта партияларида цереулид токсини мавжудлиги сабаб қилиб келтирилган эди. Бундан ташқари, шунга ўхшаш чоралар Россия ва баъзи Европа мамлакатларида жорий этилгани маълум.
Шуни қўшимча қилиш лозим, цереулид овқатни қайнатиш ёки қайта иситиш орқали йўқ бўлмайдиган токсин ҳисобланади. Ушбу модда организмда кўнгил айниши, қусиш ва қорин оғриғи каби аломатларга эга ўткир заҳарланиш ҳолатини келтириб чиқаради.
