kaztransoil.kz сайти фотосурати
Қозоғистон декабрь ойида Атасу-Алашанкоу қувури орқали Хитойга тахминан 50 000 тонна Қашаған нефтини жўнатишни режалаштирмоқда, бу билан у асосий экспорт йўналиши — Каспий қувури консорциуми (КҚК) тизимидаги ҳажмни бошқа йўналишга йўналтиради. Бу ҳақда Reuters агентлигига соҳадаги икки манба маълум қилган.
Қозоғистон Украина учувчисиз қайиқлари ҳужуми натижасида КҚКнинг Қора денгиз терминалидаги бардошли лангар ускуналаридан бирига зарар етказилганидан сўнг нефть экспорти учун муқобил йўлларни қидира бошлади. Қозоғистон Энергетика вазирлиги Қашаған нефтини Хитойга экспорт қилиш бўйича дарҳол изоҳ бермади, аммо Каспий нефтини экспорт қилиш учун қўшимча йўлларни ўрганаётганини тасдиқлади. «КҚК денгиз терминалидаги ҳодиса экспортнинг тўлиқ тўхтатилишига олиб келмади... Қозоғистон Энергетика вазирлиги ишлаб чиқарувчи компаниялар билан биргаликда ҳозирда нефть ҳажмларини қайта тақсимлаш устида ишламоқда. Муқобил экспорт йўлларидан фойдаланиш кучайтирилди», — дейилади вазирликнинг Reuters сўровига берган ёзма жавобида.
Илгари шикастланган КҚК терминали 11 декабргача тўлиқ қувватга қайта олмаслиги ҳақида хабар берилган эди. Ҳозирда унинг учта бардошли лангар ускуналаридан фақат биттаси ишламоқда (БЛУ-2 ҳужум натижасида ишдан чиққан ва БЛУ-3 га ноябрь ойи ўрталаридан бери техник хизмат кўрсатилмоқда).
Атасу-Алашанкоу магистрал нефть қувури «Қозоғистон Хитой қувури» (ҚХҚ) компаниясига тегишли. Бу «Казтрансойл» (50%) ва China National Oil and Gas Exploration and Development Company Ltd. (50 %) қўшма корхонаси ҳисобланади. Қувур Қозоғистонни Хитойнинг Шинжон ҳудуди билан боғлайди. Одатда унга бошқа конлардан хом нефть йўналтирилади. Қашаған нефтни асосан Новороссийскдаги КҚК терминали орқали экспорт қилади.
Ҳозирда Атасу-Алашанкоу қувури Хитойга ойига ўртача 85 000 — 86 000 тонна хом нефть етказиб беради. Қозоғистон бу йил ушбу йўналиш орқали 1 миллион тонна нефть жўнатишни режалаштирган эди, 2024 йили бу кўрсаткич 1,2 миллион тонна эди.
