Тожик-афғон чегараси. afintl.com сайти фотосурати
Толиблар* ҳукуматидаги Афғонистон Ташқи ишлар вазирлиги Тожикистоннинг Хатлон вилоятида уч нафар хитойлик ишчининг ўлдирилганини қоралади. Бу ҳақда TOLO News вазирликнинг жамоатчилик билан алоқалар бўлими бошлиғи Зиа Аҳмад Такалга таяниб хабар берди.
Унинг сўзларига кўра, ҳужум «минтақа мамлакатлари ўртасида тартибсизлик, беқарорлик ва ишончсизликни келтириб чиқаришга интилаётган унсурлар» томонидан амалга оширилган.
Вазирлик Хитой ва Тожикистон халқларига ҳамдардлик билдирди ва айбдорларни аниқлаш учун мазкур мамлакатлар расмийлари билан ҳамкорлик қилишга ва маълумот алмашишга тайёрлигини билдирди.
Тожикистон Ташқи ишлар вазирлиги 26 ноябрь куни уч нафар хитойлик ишчининг ўлдирилганини маълум қилди. Ҳалок бўлганлар «Шохин СМ» тоғ-кон компанияси ишчилари бўлган. Ҳодиса Тожикистондаги Хатлон вилоятининг Шамсиддин Шохин туманида содир бўлган. Афғонистонда жойлашган ҳужумчилар ўқотар қуроллар ва гранаталар тўлдирилган дрондан фойдаланишган.
Айни пайтда, Афғонистон оммавий ахборот воситалари Афғонистон-Тожикистон чегарасида янги ҳодиса юз бергани ҳақида хабар бермоқда. Afghanistan International хабарига кўра, 30 ноябрь куни кечқурун Тожикистонда Афғонистон билан чегарадош Шадак туманида йўл қурилиши лойиҳасида ишлаётган икки Хитой фуқароси ҳалок бўлган. Ҳужум Афғонистоннинг Бадахшон вилояти Маймай туманидаги Разави қишлоғи томонидан уюштирилган бўлиб, ишчиларга кичик қуроллар билан ҳужум қилинган. Манбаларга кўра, ҳужумга Маймайга бошқа туманлардан келган толибларнинг чегара кучлари алоқадор деб тахмин қилинмоқда.
Хитой ва Тожикистон Ташқи ишлар вазирликлари ҳозирча бу воқеага расман изоҳ беришмаган.
Шу билан бирга, 1 декабрь куни Тожикистон президенти Эмомали Раҳмонга сўнгги ҳафтада Афғонистон билан чегарада иккита отишма содир бўлгани, беш киши ҳалок бўлгани ва яна беш киши яралангани ҳақида хабар берилган.
Мазкур хабар Тожикистон-Афғонистон чегарасидаги вазият ва хавфсизликни мустаҳкамлаш йўллари муҳокама қилинаётган хавфсизлик ва ҳуқуқни муҳофаза қилиш идоралари раҳбарлари билан ўтказилган ишчи йиғилишда маълум қилинди.
Раҳмон «Афғонистон фуқароларининг ноқонуний ва провокацион ҳаракатларини қаттиқ қоралади ва масъул шахсларга муаммони ҳал қилиш ва бундай нохуш ҳодисалар олдини олиш учун самарали чоралар кўришни буюрди», — деб ёзади Тожикистон президенти матбуот хизмати.
*Кўпгина мамлакатларда террорчи сифатида тан олинган ва тақиқланган ташкилот.
