Туркманистоннинг Болқон вилоятидаги Мамметкўл ва Делили сув омборлари бутунлай қуриб қолди. Бу ҳақда «Метеожурнал» хабар берди.
Бунинг сабаби узоқ давом этган қурғоқчилик, 2024/2025 йилги совуқ даврда ёғингарчиликнинг камлиги ва Этрек (Атрек) дарёсидан сув тўлиқ келмаганидан юзага келган, деб ҳисобланади.
2024 йил ноябрь ойида Мамметкўл сув омборининг умумий сув сатхи 3,26 км² ни, Делили сув омбориники эса 0,2 км² ни ташкил этган. 2025 йил март ойига келиб Мамметкўл сув омборининг майдони 2,5 км² гача, Делили сув омбори эса деярли 0,08 км² гача қуриб қолган.
Май ойида Мамметкўл сув омборининг майдони 0,65 км² гача қисқарди ва Делили сув омбори бутунлай қуриб қолди. 2025 йил июнь ойининг бошларига келиб, Мамметкўл сув омбори ҳам бутунлай қуриб қолган. Мамметкўл охирги марта 2021 йил октябрь ойида бутунлай қуриб қолган ва 2023 йил августигача қуруқ бўлган, ўшанда у катта сув тошқини ҳисобига тўлганди.
Мамметкўл сув омбори 1964 йилда фойдаланишга топширилган, унинг тўлиқ сиғими 20,5 миллион кубометрни, фойдаланишга яроқли сиғими эса 17,9 миллион кубометрни ташкил қилади. Делили сув омбори 1970 йилда фойдаланишга топширилган, унинг тўлиқ ва фойдаланишга яроқли сиғими 5,32 миллион кубометрни ташкил этади.
Этрек об-ҳаво станцияси маълумотларига кўра, 2025 йил январидан ноябргача фақат февраль ва март ойларида меъёрга яқин ёғингарчилик бўлган, бошқа ойларда эса меъёрдан анча паст бўлган. Январь ойида атиги 1,6 мм, май ойида эса 1,4 мм ёғган. Июндан августгача ёмғир ёғмаган ва куз ҳам қуруқ бўлган.
2025 йилнинг биринчи ярмида ёғингарчилик тақчиллиги сабабли, Амударё ҳавзаси ташқарисидаги сув омборлари ва дарёларда гидрологик қурғоқчилик кучайди. Бу Мурғоб ва Тежен сув омборларида сув сатҳининг кескин пасайишига олиб келди. Кам оқимли Атрек дарёси билан озиқланадиган сунъий сув омборлари бутунлай қуриб қолган. Кузда Амударё ҳавзаси сув омборларида сувни бошқариш билан боғлиқ вазият ҳам ёмонлашган.
