Ўзбекистон президенти матбуот хизмати фотосурати
Ўзбекистон президенти Шавкат Мирзиёев Қўшма Штатларга ташрифи давомида АҚШ Конгресси вакиллари билан учрашувлар ўтказди. Унда икки мамлакат ўртасидаги стратегик шерикликни мустаҳкамлаш масалалари муҳокама қилинди. Музокаралар 5 ноябрь куни президентнинг Вашингтондаги қароргоҳида бўлиб ўтди, деб хабар беради унинг матбуот хизмати.
Вакиллар палатаси (қуйи палата) аъзолари Билл Хайзенга, Кэрол Миллер ва Сидни Камлагер-Дав билан учрашувда икки мамлакат парламентлари ўртасидаги ҳамкорлик масалалари кўтарилди. Шунингдек, Ўзбекистон ва АҚШ қонун чиқарувчи органлари ўртасидаги алоқалар жадал ривожланиб бораётгани таъкидланди.
АҚШ Конгрессида Ўзбекистон билан ҳамкорлик бўйича кокус самарали фаолият олиб бораётгани мамнуният билан қайд этилди. Ҳар йили Вакиллар палатасида кокус кўмагида икки томонлама муносабатларни мустаҳкамлашга хизмат қилаётган Ўзбекистон кунлари ўтказиб келинмоқда.
Конгресс олий даражада эришилган, энг аввало, савдо-иқтисодий, инвестициявий ва маданий-гуманитар алоқаларни кенгайтиришга доир келишувларни амалга оширишга ҳар томонлама кўмаклашиши муҳим экани таъкидланди.
Ҳудудлараро алоқаларни кенгайтириш, конгрессменлар вакиллик қилаётган Ғарбий Виржиния, Мичиган ва Калифорния штатлари билан амалий ҳамкорликни йўлга қўйишга алоҳида эътибор қаратилди. Учрашув якунида АҚШ Конгресси вакилларининг Ўзбекистонга ташрифини уюштириш, шунингдек, икки мамлакат ҳудудлари раҳбарлари бошчилигидаги ишбилармон доиралар делегацияларининг ўзаро ташрифларини ташкил этишга келишиб олинди.
Президент матбуот хизмати хабар беришича, давлат раҳбари АҚШ Сенатида (Конгресснинг юқори палатаси) Марказий Осиё бўйича кокуснинг ҳамраиси, сенатор Стив Дейнс билан алоҳида музокаралар ўтказди.
Мирзиёев кокуснинг ишини юқори баҳолади ва мамлакатлар ўртасидаги муносабатлар янги сифат даражасига кўтарилганини таъкидлади. Ўзаро савдо кўрсаткичлари ўсиб бормоқда ва муваффақиятли қўшма лойиҳалар сони ортиб бормоқда.
Кейинги ойларда рекорд қийматдаги келишув ва шартномалар имзоланди. Бу галги ташриф давомида янги иқтисодий ҳужжатлар имзоланиши режалаштирилган. АҚШ Конгресси мазкур келишувларнинг амалга оширилишини қўллаб-қувватлаши муҳим экани таъкидланди.
Сенатор Стив Дэйнс вакиллик қилаётган Монтана штати билан фаол ҳамкорликни давом эттиришга алоҳида эътибор қаратилди. Штат ишбилармонларининг делегациясини Ўзбекистонга ташрифини ташкил этиш бўйича келишувга эришилди.
ℹ️ Кокус (Caucus) — ягона ҳаракатлар йўналишини ишлаб чиқиш устида ишлаётган қонун чиқарувчи орган аъзолари уюшмаси. АҚШ Конгрессида Ўзбекистон билан муносабатларни ривожлантиришга бағишланган шунга ўхшаш гуруҳ 2018 йили президент Шавкат Мирзиёев ташаббуси билан ташкил этилган.
