freepik.com сайти фотосурати
Қозоғистон Мажилиси (парламенти қуйи палатаси) депутати Мурат Абенов давлат телевидениесида келин ўғирлаш тарғиб қилаётганини маълум қилди, деб ёзади Kursiv.kz.
««Хабар»даги кўрсатувда «Менга турмушга чиқишга рози бўлмасанг, сени ўғирлаб кетаман» деган сўзлар эфирга узатилди. Лекин бу аёллар ҳуқуқларига қарши очиқ ташвиқот. Мен бундан ғазабдаман! Биз давлат телевидениесида бундай хатти-ҳаракатларга йўл қўйолмаймиз», — деди парламент депутати брифингда.
У келин ўғирлаш учун жиноий жавобгарлик борлигини эслатиб ўтди ва журналистлардан «бундай қилиш мумкин эмаслигини жамиятга тушунтириш учун биргаликда ишлашни» сўради.
«Қизларни ўз розилигисиз ўғирлаётганлар инсон ҳуқуқларини поймол қиладилар. Вояга етмаган қизларнинг шаъни ва қадр-қимматига тажовуз қилаётганлар шуни тушуниши керакки, биз қизларимизни барча воситалар билан ҳимоя қиламиз. Нафақат бевосита айбдорлар, балки бунга ёрдам берганлар, уларни ушлаб турувчилар ва остонада ётволиб, «устимдан ўтиб кет» деганлар ҳам жавобгарликка тортилади. Уларнинг барчаси жавобгарликка тортилади, биз қамоқхоналарни тўлдириш ниятида эмасмиз, мақсадимиз -бундай жиноятлар камайсин», — деди Абенов.
Депутатнинг қўшимча қилишича, биргина Туркистон вилоятида ўтган йили 13 та келин ўғирлаш ҳодисаси қайд этилган, бу унинг фикрича, «жуда юқори кўрсатгичдир».
Қозоғистонда бу каби жиноятлар учун жиноий жавобгарлик ўтган йилнинг ёзида жорий қилинган. Никоҳга мажбурлаш ҳолати эндиликда жиноятнинг оғирлигига қараб жарима, ахлоқ тузатиш ишлари, озодликни чеклаш ва 10 йилгача озодликдан маҳрум қилиш билан жазоланади.
Илгари республикада бундай ишлар бўйича айбланувчилар одатда одам ўғирлаш тўғрисидаги қонун бўйича судланган. Аммо бу қонунда ўғирланган аёлни ўз ихтиёри билан озод қилган шахс, агар унинг қилмишида бошқа жиноят таркиби бўлмаса, жавобгарликка тортилмайди, деган банд бор.
Ўтган йили давлатга қарашли «Хабар» телеканали «Бірақ» ток-шоуси сабаб жанжал ўртасида қолганди, унда иштирокчи аёлга зўравонлик қилган эри билан ярашиш таклиф қилинганди. Ўшанда «Хабар» агентлиги бошқарув раиси Кемелбек Ойшибаев жабрланувчидан узр сўраганди. Ўз навбатида Маданият вазирлиги раҳбари Аида Балаева давлат сиёсатини тушунтирувчи миллий телеканал бундай хатти-ҳаракатларга йўл қўймаслиги кераклигини, «Бірақ» ток-шоуси ёпилишини айтганди.
