Айдос Сарим. Nur.kz сайти фотосурати
Қозоғистон Россия ва Украина ўртасидаги музокаралар майдонига айланишга тайёр. Бу ҳақда парламент қуйи палатаси депутати, халқаро ишлар, мудофаа ва хавфсизлик бўйича парламент қўмитаси раиси ўринбосари Айдос Сарим RTVI телеканалига берган интервьюсида маълум қилди.
«Воситачилик ва модерацияга келсак, агар Қозоғистоннинг воситачи бўлиб, бирор нарсани ҳал қилишда ёрдам бериш имконияти ва зарурати бўлса, ҳа, мен биз учун шундай ролни кўраман. Бу Россия-Украина можаросига ҳам тааллуқли бўлиши мумкин. Мен умуман жараён ҳақида гапирмаяпман, албатта, лекин муайян ишларни ҳал қилишда — нега энди бундай бўлмаслиги керак? Ахир, музокаралар турли даражадаги масалаларни ҳал қилувчи турли майдонларда олиб борилади. Табиийки, буларнинг барчаси томонларнинг музокара қилиш истаги пайдо бўлгандагина содир бўлиши мумкин», — деди депутат.
Сарим шахсан ўзи «буни орзу қилишини» тан олди.
«Бу, улар айтганидек, Қозоғистон учун юксак нуқта бўларди. Қон тўкилишини тўхтатиш... бу, эҳтимол, бошқа нарсалар қатори, президентнинг дипломатик фаолиятидаги юксак чўққи бўларди: Остонада барча фаол ўйинчиларни тўплаш ва бу жараённинг бир қисмига айланиш», — деди у ва «тинчлаштириш жараёни»нинг ўзи ўнлаб йиллар давом этиши мумкинлигини қўшимча қилди.
Журналистнинг Қозоғистонда музокаралар ўтказиш учун олд шартлар борми, деган саволига депутат шундай жавоб берди: «Биз аллақачон Трампдан (АҚШ президенти Доналд Трамп – таҳр.изоҳи) шундай сигнални кўрдик – у тез орада минтақамизга ташриф буюришни режалаштирмоқда. Ҳолбуки, Қозоғистон ҳалол брокер ва воситачи экан, нега бундай бўлмаслиги керак?».
«Ва бундан ҳам муҳими: Қозоғистон Россия президенти Владимир Путин учун ҳам, Трамп учун ҳам қулай мамлакат; биз уларнинг хавфсизлигини ва бошқа нарсаларни таъминлашга тўлиқ қодирмиз», — дея хулоса қилади Айдос.
Январь ойи бошида Қозоғистон президенти Қосим-Жомарт Тўқаев «Ана тілі» газетасига берган интервьюсида Дональд Трамп билан телефон суҳбатида Украинадаги вазиятни муҳокама қилганини маълум қилди. У Остонанинг Украина бўйича музокаралар бошланишини қўллаб-қувватлашини яна бир бор таъкидлаб, мамлакат воситачилик сўрамаётганини ва халқаро майдонда «Қозоғистон салоҳияти ва имкониятларидан келиб чиқиб» ҳаракат қилаётганини таъкидлади. Тўқаев, шунингдек, республика «халқаро муаммоларни ҳал қилишда ёрдам беришга доим тайёр»лигини таъкидлади.
Аввалроқ Қозоғистон расмийлари Москва ва Киев ўртасидаги музокаралар учун ўз ҳудудини бир неча бор таклиф қилган. Бу фикрни бошқалар қатори собиқ Ташқи ишлар вазири Мухтор Тилеуберди ҳам таъкидлаган. Қозоғистоннинг собиқ президенти Нурсултон Назарбоев ҳам Владимир Путин ва Украина президенти Владимир Зеленский ўртасидаги учрашувни Қозоғистонда ташкил этишни таклиф қилган.
