Жоомарт Дуулатов ва Александр Александров. Kloop видеосидан кадр
Бишкекнинг Первомайский туман суди Kloop («Клооп») нинг собиқ ходимлари — икки оператор ва икки ҳисобчига нисбатан ҳукм чиқарди.
Kloop хабарига кўра, оператор ва муҳаррирлар Александр Александров ва Жоомарт Дуулатовнинг ҳар бири беш йилга умумий режимдаги колонияга ҳукм қилинган. Бухгалтерлар Н.О. ва К.Э. ҳар бирига уч йил пробация муддати берилган.
Айблов томони операторларга саккиз йил, бухгалтерларга олти йиллик қамоқ жазосини сўраган.
Айбланувчилар ўз айбларига иқрор бўлишмаган. Судда улар тергов томонидан босим ўтказилаётганини даъво қилиб, адвокатлари йўқлигида берган иқрорликларидан воз кечишган.
Александровнинг сўзларига кўра, иш материалларида унинг ишда айтиб ўтилган видеотасвирга олгани, монтаж қилгани ва виделматериалларни бирлаштиргани ҳақида кўрсатмалари мавжуд.
«Лекин мен бундай қилмаганман. Шундай кўрсатма беришим эвазига менга уй қамоғини таклиф қилишганди... Мен ўзимга туҳмат қилишга мажбур бўлдим», — деди у судда.
«Биринчи марта тан олганимда, ростини айтсам, қўрқиб кетдим. Биринчи марта тергов изоляторига тушдим. Терговчилар эса айбимни тан олишимни, шундан сўнг мени четга чиқмаслик тилхати билан уй қамоғига қўйиб юборишларини айтишди. Охир-оқибат панжара ортига тушиб қолишдан қўрқиб [тан олдим]», — деди Дуулатов.
Ишда айбланаётган бухгалтерлар журналистик текширувларга алоқаси йўқлигини айтишган. Улар Temirov Live бошловчиси Болот Темировни танимасликларини, унинг ишини кўрмаганликларини ҳамда Kloop ёки Temirov Live нашрларида чоп этилган материалларга алоқаси йўқлигини таъкидлаганлар — бу ҳисобчилар фаолиятига кирмайди.
ℹ️ Kloopнинг собиқ ходимлари 28 май куни ҳибсга олинган. Икки кундан сўнг Александр Александров ва Жоомарт Дуулатов икки ойга ҳибсга олинган. Яна бир неча киши ҳибсга олинган, уларнинг аксарияти Kloopнинг собиқ ёки амалдаги ходимлари бўлган. Тез орада улар ҳеч қандай айбловларсиз, лекин маълуаотларни ошкор қилмаслик тилхати билан озод қилинган.
Kloopнинг собиқ ва амалдаги журналистлари ҳамда бошқа ходимлари уйларида тинтув ўтказилган, ўнга яқин киши Миллий хавфсизлик давлат қўмитаси (МХДҚ) томонидан сўроқ қилинган ва сўнг қўйиб юборилган.
Журналистларни ҳибсга олиш бошланганидан сўнг Қирғизистон президенти Администрацияси матбуот хизмати раҳбари Дайирбек Ўрунбеков ҳибсга олинган ОАВ вакиллари фаолиятини Болот Темиров молиялаштирганини маълум қилганди. Темировнинг ўзи эса мулозимга зудлик билан жавоб қайтариб, унинг сўзларини «ёлғон» ва «ҳибсларни оқлашга уриниш» деб атади.
Тез орада республика Миллий хавфсизлик давлат қўмитаси вазиятга изоҳ берди. Қўмитага кўра, «Клооп Медиа» тугатилганига қарамай, ушбу тузилма вакиллари ўз фаолиятини давом эттирмоқда. Бундан ташқари, терговчиларнинг фикрига кўра, журналистларнинг фаолияти «оммавий тартибсизликларни янада уюштириш учун жамоатчилик фикрини манипуляция қилиш мақсадида фуқаролар ўртасида норозиликни қўзғатишга» қаратилган.
Июль ойида суд Kloopнинг тўрт нафар ходими аккаунтларини блоклаб қўйди.
Нашр таҳририяти бир неча йиллардан бери ҳокимият томонидан босим остида. 2023 йил кузида Kloop сайти блокланди, 2024 йил февралида эса суд лойиҳанинг юридик шахси – Kloop Media жамоат фондини тугатди.
