freepik.com сайти фотосурати
Европа Иттифоқи илк бор Қозоғистонга нисбатан иккиламчи санкцияларни қўллаш имкониятини кўриб чиқмоқда, дея ёзади Bloomberg ўз манбаларига таянган ҳолда.
Нашрга кўра, санкциялар қўлланилган чоғда Остонага маълум жиҳозларни импорт қилиш тақиқланади, зеро Европа мулозимларининг фикрича, уларнинг катта қисми Россияга йўналтирилмоқда, у ерда эса қурол-яроғ ишлаб чиқишда ишлатилмоқда.
Қарор ҳали қабул қилинмаган, агентлик суҳбатдошлари таъкидлашича, бунинг учун далиллар ва Европа Иттифоқининг барча аъзолари уни қўллаб-қувватлаши керак.
Таклиф этилаётган чора-тадбирлар ҳозирда муҳокама қилинаётган Европа Иттифоқининг Россияга қарши санкциялари 19-чи пакетининг бир қисми бўлиши мумкин. Янги пакет, шунингдек, Россия банклари ва нефть компанияларига қарши чекловларни кучайтиришни, «яширин» флот танкерларини суғурталашни тақиқлашни, учинчи давлатлар нефть савдогарларига қарши санкцияларни ва Россия ҳарбий саноатида қўлланилиши мумкин бўлган янги экспорт товарларини тақиқлашни ўз ичига олади.
Илгари Қозоғистон компаниялари Европа Иттифоқи ва АҚШнинг санкцияларида бўлган, аммо бутун мамлакатга қарши иккиламчи санкциялар биринчи марта муҳокама қилинмоқда.
Россиянинг Украинага қарши махсус ҳарбий операция амалиётини бошлагандан сўнг Қозоғистон Қўшма Штатлар ва Европа давлатларининг Москвага қарши санкцияларини қўллаб-қувватламади. Шу билан бирга, Остона бир неча бор киритилган санкциявий режимга амал қилаётганини ва Россияга санкцияларни четлаб ўтишига ёрдам бермаётганини таъкидлаганди.
