Айсолтан Ниёзова. Ижтимоий тармоқдаги фотосурат
Польша чегарачилари Туркманистон номидан Интерпол сўрови билан Pussy Riot бадиий гуруҳи аъзоси, Россия фуқароси Айсолтан Ниёзовани қўлга олди. Бу ҳақда «Гундогар» хабар берди.
Асли ашхободлик Айсолтан Ниёзова 1995 йили Россияга кўчиб келган ва ҳеч қачон Туркманистон фуқаролигига эга бўлмаган. 2000 йиллар бошида Ниёзова Туркманистон Марказий банкидан 41 миллион доллар ўғирлаш бўйича ишда айбланувчига айланган. Туркманистон расмийларига кўра, Ниёзова Москва Индэкс банки директорлар кенгаши раиси бўла туриб Германиянинг Deutsche Bankи орқали маблағларни олиб чиқиш ва қонунийлаштиришда иштирок этган.
2011 йили Швейцария ҳукумати Ниёзовани ҳибсга олиб, Москвага экстрадиция қилган. Россия суди уни айбдор деб топган ва олти йилга озодликдан маҳрум қилган. Озодликка чиққанидан сўнг Ниёзова Россия Федерациясида яшашни давом эттирган ва Россия Украинада махсус ҳарбий операция (МҲО) ўтказилиши эълон қилинганидан сўнг Европага жўнаб кетган.
Ниёзова Pussy Riot аъзоларидан бири Мария Алёхина билан тергов изоляторида танишган. Қамоқдан чиққанидан кейин у Pussy Riot билан норозилик намойишларида қатнаша бошлаган.
2022 йили Ниёзовани Словения ва Хорватияда қўлга олинган. Барча ҳибсга олишлар Ашхобод ташаббуси билан Интерполнинг қизил хабарномалари билан боғлиқ бўлган. Словенияда Ниёзова 10 соатдан кейин қўйиб юборилган, Хорватияда у икки кун тергов изоляторида бўлган, шундан сўнг қўйиб юборилган. Польша расмийлари унга нисбатан қандай чоралар кўрилиши мумкинлиги ҳозирча номаълум.
Аввалроқ Ниёзованинг адвокатлари унинг жазо муддатини ўтаб бўлганини ва Туркманистон фуқароси эмаслигини таъкидлаб, қидирувдагилар рўйхатидан олиб ташлаш учун Интерполга мурожаат қилишган. Бироқ Халқаро Жиноий Полиция Ташкилоти Ашхобод илтимосини кучда қолдирган.
