kgma.kg сайти фотосурати
Қирғизистон президенти Садир Жапаров тиббиёт соҳасида мутахассислар тайёрлашда давлат монополиясини жорий этиш тўғрисидаги фармонни имзолади.
Ҳужжатга кўра, ушбу йўналишдаги таълим фаолиятига мутлақ ҳуқуқ И.К. Ахунбаев номидаги Қирғизистон давлат тиббиёт академияси (ҚДТА) га ўтказилди.
Фармон хусусий тиббиёт олий ўқув юртлари сонининг жадал ўсиб бораётгани ва у ердаги битирувчиларнинг билим даражаси пастлиги муносабати билан қабул қилинган. Президент матбуот хизмати таъкидлашича, аксарият хусусий олий ўқув юртларида зарур клиник шароит йўқ, профессор-ўқитувчилар таркиби малака талабларига жавоб бермайди, ўқув жараёни асосан минимал амалий тайёргарлик ва расмий диплом беришга асосланган.
Натижада ҳар йили билим ва амалий кўникма даражаси паст бўлган юзлаб мутахассислар битирмоқда, бу эса тиббий таълим тизимига бўлган ишончга, Қирғизистон дипломининг халқаро мақомига путур етказмоқда. Шу билан бирга, миллий соғлиқни сақлаш тизимида кадрлар тақчиллиги кучаймоқда.
Янги тартибга кўра, хусусий тиббиёт олий ўқув юртлари 2026 йил 1 июнига қадар давлат аккредитациясидан ўтиши керак ва келажакда улар ҚДТА филиаллари ёки бўлинмаларига айлантирилиши мумкин. Аккредитациядан ўтмаган муассасалар академия раҳбарлигида фақат тайёргарлик курслари ёки ўқув ва клиник базалар сифатида фаолият юрита олади.
Ҳукумат 2026 йил 1 январга қадар тиббиёт ва фармацевтика мутахассисликлари бўйича ягона давлат таълим стандартларини ишлаб чиқиши ва тасдиқлаши лозим.
Жапаров ислоҳотлар тиббиёт ва фармацевтика соҳаларида кадрлар тайёрлаш тизимини тубдан такомиллаштириш, коррупция хавфини минималлаштириш, миллий соғлиқни сақлаш ва мамлакатнинг халқаро нуфузини ҳимоя қилишга қаратилганини алоҳида таъкидлади.
ℹ️ 2022 йил февраль ойида ўша пайтдаги Соғлиқни сақлаш вазири Алимқодир Бейшеналиев мамлакатда 24 та тиббиёт таълим муассасаси фаолият юритаётгани ҳақида маълум қилган эди. Жумладан, учта давлат олийгоҳи — Қирғизистон Давлат Тиббиёт Академияси ва Ўш давлат университети ва Қирғизистон-Россия Славян университети факультетлари. Яна 21 та таълим муассасаси, Бейшеналиевга кўра, «мансабдорлар ёки пули борлар«га тегишли. Шу билан бирга, у 17 та хусусий тиббиёт олий ўқув юртлари талабларга жавоб бермагани учун уларни ёпиш ниятида эканини маълум қилганди.
ОАВ маълумотларига кўра, хусусий тиббиёт университетлари талабаларининг аксарияти Жануби-Шарқий Осиё давлатлари ва араб дунёси фуқароларидир. 2020 йили Покистон Қирғизистондаги барча тиббиёт университетларини қора рўйхатга киритгани ва ўз фуқароларига уларга ўқишга киришни тавсия этмаслигини маълум қилганди. Бунга сабаб Қирғизистон тиббиёт олийгоҳлари дипломига эга бўлган покистонликларнинг 90 фоизи Покистон Тиббиёт кенгашида мажбурий имтиҳондан ўта олмагани ва уларнинг дипломлари ўз мамлакатида тан олинмагани бўлган.
