Нозимжон Холмуродов. Ўзбекистон президенти матбуот хизмати фотосурати
Ўзбекистонда тўқимачилик, чарм ва ипак саноатини мувофиқлаштирувчи Енгил саноатни ривожлантириш агентлиги ташкил этилади. Бу ҳақда Президент Шавкат Мирзиёев 13 август куни Европа ва АҚШга тайёр тикувчилик маҳсулотлари экспортини кенгайтириш, саноатни стандартлаштириш ва рақамлаштириш масалаларига бағишланган видеоселектор йиғилишида маълум қилди.
Агентликка Инвестициялар, саноат ва савдо вазирининг биринчи ўринбосари Нозимжон Холмуродов раҳбарлик қилади. Агентлик ҳузурида тажрибали тадбиркорлар кенгаши тузилиб, соҳа корхоналарини имтиёзли айланма маблағлар билан таъминлаш учун 200 миллион долларлик махсус жамғарма шакллантирилади.
Янги Агентликнинг вазифаларига тадбиркорлик субъектлари билан доимий мулоқотни давом эттириш, ишлаб чиқариш таннархини пасайтириш, ишлаб чиқариш ва экспорт ҳажмини ошириш бўйича ечимлар ишлаб чиқиш, тайёр маҳсулот экспортини икки баробарга ошириш учун «божхона ҳудудида қайта ишлаш» режимидан фойдаланишни кенгайтириш киради. Агентлик, шунингдек, ҳамкорликни кучайтириши ва кам фойдаланиш даражасидаги корхоналарни молиявий соғломлаштиришга кўмаклашиши керак.
Президент мутасадди идораларга қуйидагиларни топширди:
▪️ халқаро сертификатларга эга корхоналар сонини 300 тага етказиш;
▪️ айланмаси 1 миллиард доллардан катта брендлар билан ҳамкорлик қилиш бўйича «йўл харита»сини ишлаб чиқиш ва сентябрь ойида Тошкентда бўладиган йирик кўргазмага ушбу компанияларни таклиф қилиш;
▪️ Сент-Луис ва Нью-Йорк шаҳарларида 2 та савдо уйини очиш;
▪️ сунъий интеллектни жорий қилиш орқали даромадни 20-30 фоизга ошириш, фаолиятни шаффофлаштириш ва яширин иқтисодиёт омилини камайтириш, ERP тизимини жорий қилиш (ЕRP ўқитиш харажатларининг бир қисми давлат томонидан қопланади).
АҚШда йилига қарийб 100 миллиард долларлик текстиль бозори бор, муқобил қўллаб-қувватлаш чоралари орқали ушбу мамлакатга экспортни 5-6 карра ошириш мумкинлиги қайд этилди. Президент глобал савдо қоидалари ва логистика соҳасидаги муаммолар шиддат билан ўзгариб бораётган бир шароитда тўқимачилик саноатини ривожлантиришга алоҳида ёндашувлар зарурлигини таъкидлади, шунингдек, чарм, ипак ва гиламчилик саноатини ривожлантириш бўйича ташаббусларни илгари сурди.
Мирзиёев қўллаб-қувватлаш чора-тадбирлари жами 7 триллион сўм (560 миллион доллар)га тенг эканини таъкидлади.
«Бу сармоялар ўз самарасини бериши керак. Бугунги кунда бюджетга 1 сўм қўшимча даромад келтириш нақадар қийин эканини тушунганлар бу қўллаб-қувватлашнинг аҳамиятини юқори баҳолайдилар», — деди президент.
Мирзиёев халқаро консультантлар билан биргаликда тўқимачиликни 2030 йилга қадар ривожлантириш дастурини ишлаб чиқиш ҳамда чарм, ипак ва гиламчилик саноатини ривожлантириш бўйича ҳам таклифларни киритиш вазифасини қўйди.
