today.kg сайти фотосурати
Бишкек мэрияси ишлаб чиққан ҳужжат лойиҳасига кўра, 2026 йил 1 январдан шаҳарда кўчалар ва бошқа географик объектлар номини ўзгартиришга 20 йиллик мораторий жорий этилади. Аммо бунгача расмийлар Қирғизистон пойтахти ҳудудининг кенгайиши муносабати билан бир қатор ўзгаришларни амалга ошириш ниятида, деб хабар беради Kaktus.media.
Кўчалар ва хиёбонлар номларини иложи борича тезроқ ўзгартиришнинг долзарблиги шаҳар мэриясининг бир кўча бир вақтнинг ўзида бир нечта номга эга бўлиши, такрорланишни бартараф этиш истаги билан боғлиқ.
Биринчи муаммо ҳақида гапирилганда, қишлоқ туманлари (бир ёки бир нечта қишлоқ аҳоли пунктларидан иборат муниципалитетлар), қишлоқлар ва шаҳарга туташ турар-жой массивлари метрополияга қўшиб олингандан сўнг бу масала янада оғирлашишини таъкидлаш лозим. Гап шундаки, авваллари мустақил бўлган бу аҳоли пунктларининг ўз кўча тармоғи бўлган, улар кўпинча пойтахтдаги номларни такрорлайди. Масалан, деярли ҳар бир вилоят ёки қишлоқда Манас, Горький, Панфилов ва ҳоказо номли кўчалар мавжуд. Ҳудудлар ҳозир шаҳар чегарасида бўлгани учун манзилни қидириш, ҳужжатларни тўлдириш ёки такси чақиришда тартибсизликларни келтириб чиқаради.
Бундан ташқари, расмийлар бир нечта кўчалар деярли бир тўғри чизиқда жойлашган, бир-бирига туташ йўл участкаларидан халос бўлиш ниятида. Шундай қилиб, Жанубий автомагистрал уч қисмга бўлинган: Жайил Баатир, Масалиев кўчалари ва Токомбаев шоҳ кўчаси. Ҳокимлик режасига кўра, ислоҳот натижасида автомобил йўли бошидан охиригача Жайил Баатир кўчасига айланади. Шунга кўра, уйларнинг рақамланиши ҳам ўзгаради.
ОАВнинг ёзишича, агар пойтахт мэрияси лойиҳаси барча даражада маъқулланса, Бишкекдаги икки мингдан ортиқ бино манзилини ўзгартиради. Энг муҳим ўзгаришлар Лев Толстой кўчасида (540 та бино), Маевка қишлоғидаги Молодая Гвардия шоҳ кўчасида (361 та бино), Аали Токомбаев ва 7 апрель кўчаларида – 276 ва 270 та биноларга нисбатан содир бўлади.
Кўчалар номи ва манзилларни ўзгартириш учун шаҳар бюджетидан қўшимча маблағ жалб этилади. Аммо харажатларнинг тахминий миқдори кўрсатилмаган.
Бироқ, ҳозирда лойиҳа жамоатчилик муҳокамасидан ўтказилмоқда ва бишкекликлар ушбу ислоҳотлар бўйича ўз фикр-мулоҳазаларини шаҳар кенгаши (депутатлар кенгаши) порталида изоҳ қолдириш ёки шаҳар мэриясига мурожаат қилиш орқали билдиришлари мумкин.
