Сатжан Аблалиев. gov.kz сайти фотосурати
Қозоғистон Транспорт вазири ўринбосари Сатжан Аблалиев ўз лавозимидан озод этилди. Бу ҳақда Nur.kz нашрига республика ҳукумати матбуот хизмати хабар берди.
Шунингдек, ҚР Транспорт вазирлиги сайтининг «Структура» бўлимида Сатжан Аблалиев ҳақида бошқа маълумот йўқ. У ерда вазир Нурлан Сауранбаевнинг бошқа икки ўринбосари – Мақсат Калиакпаров ва Талгат Ластаев тилга олинган.
Аблалиев 2023 йил октябрь ойидан буён Транспорт вазири ўринбосари лавозимида ишлаб келаётган эди. Бунгача у Шимолий Қозоғистон вилояти ҳокими ўринбосари бўлган, Автомобил йўллари қўмитасида масъул лавозимларда ишлаган.
Август ойи бошида Қозоғистон Миллий хавфсизлик қўмитаси матбуот хизмати Транспорт вазири ўринбосари пора олаётганликда гумонланиб ҳибсга олингани ҳақида хабар берган эди. МХҚ ҳибсга олинган шахснинг исм-шарифини ошкор қилмаган, бироқ интернетда бу Сатжан Аблалиев экани ҳақида маълумот тарқалган. Ҳозирда у ҳибсда.
Tengrinews.kz эслатишича, бир кун аввал Бош вазир Олжас Бектенов тегишли вазирликларни божхона хизмати фаолияти ёмон ташкил этилгани, шунингдек, Россия ва Қирғизистон билан чегарадаги автомобил ўтказиш пунктларини таъмирлаш ишлари чўзилиб кетгани учун танқид қилган эди.
Бектенов Давлат даромадлари қўмитаси ва Автомобил йўллари қўмитаси раисларини «меҳнатни нотўғри ташкил этганликлари учун» жазолашни буюрди. Юқорида тилга олинган қўмиталарга масъул бўлган Молия вазири Мади Такиев ва Транспорт вазири Нурлан Сауранбаев тартибни сақлаш учун «керакли жойга» жўнатилди.
