uznews.uz сайти фотосурати
Жиззах вилояти Зафаробод туман суди Россия армиясида шартнома бўйича хизмат қилган маҳаллий фуқарони ёлланма аскарликда айбдор деб топди. 24 ёшли К.С. 4 йил муддатга озодликни чеклаш жазосига ҳукм қилинди, деб ёзади UzNews.uz суд материалларига таяниб.
2024 йил октабрь ойида ўзбекистонлик Россияга ишлаш учун кетган. Унинг сўзларига кўра, у Телеграм орқали 150 минг рубль (тахминан 2 минг доллар) маош оладиган арра заводида бўш иш ўрни ҳақида билиб олган. Тиббий кўрикдан ўтган мигрант меҳнат шартномасини имзолаган. У ҳақиқатан ҳам кейинчалик Мудофаа вазирлиги билан ҳарбий хизматни ўташ бўйича шартнома имзолаганини англаб етганини ва алданганини таъкидлаган.
Судланувчи ноябрь ойидан Россия Федерациясининг Курск вилоятидаги Большое Солдатское қишлоғида қўриқлаш постларида қатнашганини, бу ерга яқин жойда Россия ва Украина армиялари ўртасида тўқнашувлар содир бўлганини тан олган. Қолаверса, ўзбекистонлик йигитга агар топшириқларни бажаришдан бош тортса, 5 йилга озодликдан маҳрум этилиши билан таҳдид қилишган.
Шу йилнинг январь-февраль ойларида йигит Суджа шаҳрида бўлган, у ерда жанговар позицияларга озиқ-овқат етказиб берган. Бу ерда, К.С. касал бўлиб, касалхонага, сўнгра даволаниш учун лагерга юборилган. Уни жанговар зонага қайтариб юбормоқчи эканликларини билиб, ёлланма аскар лагердан қочиб, Москвага етиб келган. Кейин Ўзбекистон элчихонаси билан боғланиб, «Қайтиш гувоҳномаси»ни олиб, уйига учиб кетган.
Судланувчининг иқрорига кўра, унга Россия армиясидаги хизмати учун 1,3 миллион рубль (16 минг доллардан ортиқ) тўланган, бу пулни мигрант ота-онасига юборган ва «аскар формаси»га сарфлаган.
Суд жараёнида К.С. билмаган ҳолда Мудофаа вазирлиги билан шартнома имзолаб, МҲОга тушиб қолганини ва имкон бўлди дегунча Ўзбекистонга қайтиб келганини ҳисобга олишларини сўраган. У айбини тан олган ва тавба қилган.
Натижада суд жазони енгиллаштирувчи ҳолатларни инобатга олиб, ёлланма аскарни 4 йил муддатга озодликни чеклаш жазосига маҳрум қилди. Мазкур муддатда унга ҳокимият рухсатисиз оммавий тадбирларда қатнашиши, интернет тармоғидан фойдаланиши, Жиззах вилояти ҳудудидан ташқарига чиқиши ва яшаш жойини ўзгартириши тақиқланади.
