Конибодом шаҳрига кириш жойи. Sugdnews сайти фотосурати
Тожикистоннинг тўрт нафар фуқароси Конибодомдаги қатор қотилликларга оид шов-шувли иш бўйича умрбод қамоқ жазосига ҳукм қилинди. Бу ҳақда 25 июль куни бўлиб ўтган матбуот анжуманида шаҳар ҳокими Даврон Зоҳидзода маълум қилди, деб ёзади «Азия-плюс» нашри.
Мулозим иш тафсилотлари билан таниш эмаслигини таъкидлаб, ҳукм чиқарилган сана ва маҳкумларнинг исм-шарифларини айтмаган.
Ваҳший қотилликлар туркуми 2024 йил 28 мартдан 29 мартга ўтар кечаси Конибодом шаҳри Комил Ёрматов кўчасида бир оиланинг беш нафар аъзоси – 65 ёшли Муҳиддин Шарифовнинг рафиқаси, келини ва икки набирасининг жасади топилганидан бошланган. Шарифов дастлаб жиноятда гумон қилинган, бироқ кейинчалик бу версия рад этилган ва у жабрланувчи сифатида тан олинган.
Навбатдаги қотиллик 16 апрелдан 17 апрелга ўтар кечаси Сайхун қишлоғида (бу аҳоли пунктлари Қонибодамда жойлашган) содир бўлган: у ерда кекса эр-хотин Музаффар ва Иноят Ўрмоновлар ўлдирилган. Музаффарнинг укаси Шарифжон Ашуров жиноятда гумонланиб ҳибсга олинган. Гумонланувчининг қариндошлари ва фарзандлари унинг айбсизлиги ва алибиси борлигига қарамай, унга нисбатан айблов эълон қилинган ва 2024 йил декабрида 20 йилга озодликдан маҳрум этилган.
28 майдан 29 майга ўтар кечаси Санчидзор қишлоғида тожик ва қирғиз бўлган икки оиладан олти киши ўлдирилган ҳолда топилган. Маҳаллий мактабнинг 42 ёшли қўриқчиси Марат Саттаров айбдор деб топилиб, кейинчалик Тожикистон Олий суди томонидан умрбод қамоқ жазосига ҳукм қилинган.
8 декабрдан 9 декабрга ўтар кечаси Шўробқалъа қишлоғида яна бир шов-шувли қотиллик содир бўлган: у ерда оиланинг олти аъзоси – эр-хотин ва уларнинг тўрт фарзандининг жасади топилган. Оила бошлиғи Наимжон Неъматов дарахтга осилган ҳолда, қолганлари эса бўғилиш белгилари билан топилган.
Орадан бир ҳафта ўтиб, 15 декабрдан 16 декабрга ўтар кечаси Ҳисорак қишлоғида икки оиладан яна тўрт киши ҳалок бўлган.
Умуман олганда, 10 ой ичида Қонибодамда етти оиладан 23 киши ҳалок бўлган. Маҳаллий аҳоли орасида қўрқув ва ваҳима тарқалган. Кечаси Қонибодам ва унинг атрофида ниқобли одамлар айланиб юргани, ижтимоий тармоқларда улар акс этган видеолар пайдо бўлгани ҳақидаги миш-мишлар вазиятни янада оғирлаштирган. Аҳоли ўз хавфсизлиги учун кўчаларда қоровуллик қилиб, тунда гулҳан ёқишни бошлаган.
2024 йил декабрь ойида Тожикистон Бош прокуратураси жиноятлар фош этилгани ва тўрт нафар гумонланувчи ҳибсга олингани ҳақида хабар берган: Солеҳжон Худойбердиев, Аҳаджон Тўхтаев, Бахтиёр Равшанов ва Манучеҳр Одилов. Эҳтимол, айнан улар умрбод қамоқ жазосига ҳукм қилинган. Бироқ иш тафсилотлари ва айбланувчиларнинг исмлари расман ошкор этилмаган.
