ТАСС фотосурати
Россия чегарачилари смартфонларида террорчи ва экстремистик ташкилотларга, шунингдек, радикал ва украинапараст жамоатчиликка алоқадор каналларга обуна бўлган Тожикистон ва Ўзбекистон фуқароларига киришга рухсат бермади. Бу ҳақда суд материалларига таяниб, ТАСС хабар беради.
Жумладан, ҳужжатлардан бирида Тожикистон фуқароси Дилшод А. Россия Федерациясида тақиқланган радикал исломий оқимлар ваъзлари акс эттирилган каналларга обуна бўлгани, шунингдек, Россияга қарши мазмундаги контентни кўргани учун Россия ҳудудига киритилмагани кўрсатилган.
Ўзбекистон фуқароси Акмалжон Б. радикал диний блогерларнинг каналлари, шунингдек, террорчилик ташкилотлари фаолияти акс эттирилган видеолавҳаларни кўргани учун мамлакатга киритилмаган. Чегара хизмати бундай қизиқишлар мамлакат хавфсизлигига таҳдид солиши мумкин, деб ҳисоблайди.
Текширувдан ўта олмаган яна бир қатор хорижликларнинг ҳам гаджетларида украинапараст каналларга обуна бўлгани, Украина махсус хизматларининг ҳаракатлари ҳақидаги видеолавҳалар ҳамда Россия ҳуқуқ-тартибот идораларини танқид қилувчи ёзишмалар борлиги аниқланган. Айрим ҳолларда чет эл фуқаролари чегарани кесиб ўтишдан олдин мессенжерлардаги ёзишмаларни ўчиришга урингани аниқланган.
ℹ️ 2024 йил 22 март куни «Крокус Сити Холл» концерт залида юз берган терактдан сўнг тизимли текширувлар кучайтирилди. Ўшандан бери суд ҳужжатларига кўра, Тожикистон ва Ўзбекистоннинг 20 дан ортиқ фуқаролари Россияда ишлаш ёки қариндошларини кўриш истагида мамлакатга кириш тақиқига қарши чиқишга уринган, бироқ суд чегарачилар қарорини ўз кучида қолдирган.
