17 июль куни Туркиянинг Болу вилояти суди январь ойида Карталкая тоғ-чанғи курортидаги Grand Kartal меҳмонхонасида содир бўлган ёнғинга оид шов-шувли иш бўйича вақтинчалик ҳукм эълон қилди, деб хабар беради Hurriet.
Суд жараёни 7 июль куни бошланган, суд мажлисларида 200 дан ортиқ жабрланувчилар, 32 нафар судланувчи ҳамда кўплаб матбуот ва жамоатчилик вакилларини қатнашиши учун маҳаллий мактаб спорт зали суд залига мослаштирилган. Айбланувчилар орасида меҳмонхона эгалари, раҳбарият, ёнғин хавфсизлиги бўлими ходимлари ва аудит учун масъул бўлган ташқи пудратчилар бўлган.
17 июль куни бўлиб ўтган суд мажлисида суд фожиадан олдин меҳмонхонани текширишда қатнашган ўт ўчирувчи Ирфан Аcарни ҳибсга олишга санкция берган. Меҳмонхона ҳудудидаги кафе эгаси Иброҳим Пўлат ва иш бўйича яна уч айбланувчи тўрт ойга уй қамоғига олинган. Меҳмонхона эгаси Ҳалит Эргул, унинг рафиқаси ва компания директорлар кенгаши аъзоси бўлган қизларининг ҳибс муддати узайтирилган ва суд уларнинг озод этишлари сўраб қилган илтимосини рад этган.
Навбатдаги суд мажлиси 22 сентябрга белгиланган. Қайд этилишича, 32 айбланувчининг 13 нафари қасддан ёки шартли қасддан одам ўлдиришда айбланиб, ҳар бири 1998 йилгача қамоқ жазосига ҳукм қилиниши мумкин.
Суд мажлисида ёнғин бошланган вақтда меҳмонхонанинг еттинчи қаватида олинган видеокузатув камералари тасвирлари кўрсатилган. Видеода меҳмонхона бош менежери Эмир Араснинг ёнғинни пайқаб, хонани тарк этгани, йўлакни кўздан кечираётгани, оиласи учун қайтиб келгани ва меҳмонлар ва ходимларни огоҳлантирмасдан, бир дақиқадан камроқ вақт ичида хотини ва болалари билан чиқиб кетганини кўриш мумкин. Ушбу тасвирни томоша қилиш залда одамларнинг шиддатли реакциясига сабаб бўлган — қурбонларнинг қариндошлари меҳмонхона раҳбариятини айблаб, бақира бошлашган.
«Мен қаттиқ афсусдаман ва пушаймонман. Озод қилишларини сўрамайман ва ёмон ниятим йўқлигига қарамай, айбимни тан оламан», — деган Арас судда.
Жабрланувчи сифатида ресепшен мудири Аднан Карадайи сўзга чиққан, воқеа содир бўлган вақтда у ҳам меҳмонхонада бўлган. Унинг сўзларига кўра, ҳамкасбларининг қўнғироқларидан сўнг у хонани тарк этиб, қалин тутун ичида одамларни фавқулодда чиқиш жойига йўналтирмоқчи бўлган. Жабрланувчилар томони у кўпроқ меҳмонларни огоҳлантириши мумкинлигини айтган ва уни ҳибсга олишларини талаб қилган. Бироқ суд далиллар етарли эмаслигини айтиб, аризани рад этган.
ℹ️ Ёнғин соат 03:30 атрофида Grand Kartal меҳмонхонасининг 2200 метр баландликда жойлашган ресторан қисмида содир бўлган. Ёнғин содир бўлган вақтда меҳмонхонада 238 нафар меҳмон бўлган. Ёнғин кўзга ташлангач, меҳмонхона ходимлари меҳмонларни эвакуация қила бошлаган. Меҳмонларнинг бир қисми 12 қаватли бинонинг деразаларидан чойшабларни боғлаб, пастга тушиш орқали ўзларини қутқаришга уринишган. Ўт ўчирувчилар қўнғироқдан тахминан 40-45 дақиқа ўтиб етиб келган, бироқ бинонинг ёғоч конструкцияси аланганинг тез тарқалишига ёрдам берган. Оқибатда 78 киши, жумладан 36 нафар бола ҳалок бўлган, яна 133 нафари жароҳатланган. Туркияда 22 январь миллий мотам куни деб эълон қилинганди.
