daryo.uz сайти фотосурати
IV Тошкент инвестиция форуми доирасида «Озарбайжон – Ўзбекистон: иқтисодий шериклик вектори» мавзусидаги панел муҳокамаси бўлиб ўтади, унинг доирасида томонлар Ўрта йўлак – Транскаспий халқаро транспорт йўналишини (ТХТЙ) ривожлантириш масалаларини муҳокама қиладилар. Бу ҳақда тадбир дастурида сўз юритилади.
Муҳокамаларда тадбиркорлар, тегишли идоралар вакиллари иштирок этади. Учрашув 11 июн куни, Тошкент форумининг учинчи куни бўлиб ўтади. Муҳокама чоғида ўзаро савдони мустаҳкамлаш, қўшма сармоявий лойиҳаларни илгари суриш, Озарбайжон ва Ўзбекистон ўртасида энергетика, транспорт, саноат, қишлоқ хўжалиги, шунингдек, рақамли технологиялар соҳасидаги ҳамкорликни ривожлантириш масалалари муҳокама қилиниши кутилмоқда.
«Форум доирасида ўзаро боғлиқликни, жумладан, Ўрта коридорни ривожлантириш бўйича минтақавий ташаббуслар кўриб чиқилади, барқарор иқтисодий шериклик учун янги имкониятлар тақдим этилади», — дейилади дастурда.
ℹ️ Ўрта йўлак — Транскаспий халқаро транспорт йўналишининг (ТХТЙ) бошқача номланиши. У Хитой-Қозоғистон чегарасидан Қозоғистон, Туркманистон, Озарбайжон, Грузия, Туркия орқали ва ундан кейин Европа давлатларига бориб тақалади. Ташиш темир йўл ва денгиз транспортини (Каспий денгизи бўйлаб) ўз ичига олади. Йўналиш узунлиги 11 минг км, ўтказиш қуввати йилига 4,5 миллион тоннадан 27 миллион тоннагача. ТХТЙ 2017 йили иш бошлаган.
ТХТХ халқаро ассоциацияси 8 мамлакатдан 20 дан ортиқ магистрал инфратузилма эгалари ва ташувчиларни бирлаштиради. Булар Озарбайжон, Грузия, Қозоғистон, Хитой, Польша, Руминия, Украина ва Туркиядир. 2021 йил ёзида Ўзбекистон лойиҳа иштирокчиларига ассоциацияланган аъзо сифатида қўшилиш қарорини эълон қилди. Уюшманинг бош қароргоҳи Остона шаҳрида жойлашган.
