Алмазбек Атамбаев. 24.kg. сайти фотосурати
Бишкекнинг Первомайский туман суди Қирғизистоннинг собиқ президенти Алмазбек Атамбаевни 2019 йили Қўй-Тош қишлоғида содир бўлган воқеалар бўйича 11 йилу 6 ойга озодликдан маҳрум қилди. Ҳукм 3 июнь куни кечқурун эълон қилинди, деб хабар беради «АКИpress».
Қамоқ муддатидан ташқари, собиқ давлат раҳбарининг мулклари мусодара қилинган ва у давлат мукофотларидан маҳрум бўлган.
Қўй-Тош воқеалари бўйича бошқа айбланувчиларга ҳам ҳукм чиқарилган. Шу тариқа, Президент Администрациясининг собиқ раҳбари Фарид Ниёзов ва республика Жогорку Кенеши (парламенти) собиқ депутати Равшан Жеенбековнинг ҳар бири 7 йилу 8 ойлик қамоқ жазосига ҳукм қилинган.
Социал-демократлар партиясининг парламентдаги собиқ вакили Ирина Карамушкина 7 йилу 6 ойга озодликдан маҳрум этилган. Атамбаевнинг тарафдори Фарҳод Баабиев 5 йилу 6 ойга озодликдан маҳрум этилган. Иш бўйича барча тўрт нафар айбланувчи суд залида қамоққа олинган.
Қолган судланувчилар 3 йилдан 5 йилга қадар муддатга пробацион назоратга ҳукм қилинган. Бу рўйхатга тўққиз киши, жумладан, Атамбаевнинг собиқ қўриқчиси Канат Сагимбаев киритилган.
Таъкидланишича, суд учта жиноят ишини битта иш юритишда бирлаштирган. Қўй -тошдаги воқеадан ташқари, ер участкаларини ноқонуний олиш билан боғлиқ эпизодлар ҳам кўриб чиқилган.
Коррупциявий фаолият учун энг оғир жазо Қирғизистон собиқ Энергетика вазири Асқарбек Шодиевга берилган, у мол-мулки мусодара қилиниб, 3 йилга давлат лавозимларида ишлаш тақиқланган ҳолда 15 йилу 6 ойга озодликдан маҳрум этилган.
Шу билан бирга, қолган тўрт нафар айбланувчи, жумладан, собиқ Ички ишлар вазири Абдулда Суранчиев ҳам «жиноят учун даъво муддати ўтганлиги сабабли» деган жумла билан жазодан қутулиб қолган.
Суд, шунингдек, Атамбаев ва Шодиевдан 5,4 миллиард сомдан (62 миллион доллар) кўпроқ пул ундириш ҳақида қарор чиқарган.
Республиканинг амалдаги раҳбари Садир Жапаров мамлакат собиқ президенти устидан ўтказилган суд жараёнига изоҳ берди. «Кабар» агентлигига берган интервьюсида у суд қарорини ҳеч ким ўзгартира олмаслигини айтди. Аммо, сиёсатчи таъкидлашича, у авф этишга ҳақли.
«Тегишли ариза билан мурожаат қилсалар, кечиришим мумкин. Қўй-тош воқеаларидан бери олти йил ўтди. Ҳаммаси совиб бўлди. Ўйлайманки, суд бу қадар қаттиққўл бўлмаслиги керак эди. Албатта, бу тиркалувчи фикр эмас, балки шахсий фуқаролик позициям: шартли жазо ёки жарима билан чекланса яхши бўларди», — деди Жапаров.
ℹ️ Қўй-Тош воқеалари бўйича суд жараёни 2022 йили бошланган. Кейинчалик суд жараёнига коррупция билан боғлиқ эпизодлар қўшилган. 2023 йил февралида иш бўйича асосий айбланувчи Алмазбек Атамбаев хорижда даволаниш учун суд томонидан ҳибсдан озод қилинган эди. Собиқ президент Испанияга учиб кетган ва шундан бери ватанига қайтмаган.
ℹ️ 2019 йил август ойида Қирғизистон Миллий хавфсизлик давлат қўмитаси махсус кучлари Атамбаевни Қўй-Тош қишлоғида жойлашган қароргоҳида қўлга олишга уринган. Аммо сиёсатчининг тарафдорлари хавфсизлик кучларига қаршилик кўрсатган. Оқибатда махсус хизматнинг бир ходими ҳалок бўлган, юздан ортиқ одам яраланган.
