Александр Бублик . sports24.kz сайти фотосурати
Қозоғистоннинг биринчи рақамли теннисчиси Александр Бублик тарихда илк бор дунёнинг кучли 10 талиги икки вакилини мағлуб этиб, энг нуфузли теннис турнирларидан бири «Ролан Гаррос» (Франция очиқ чемпионати)нинг чорак финалига чиқди.
1/8 финалда бор-йўғи 69-ўринни эгаллаб турган Бублик сенсацион тарзда дунёнинг 5-рақами британиялик Жек Драперни мағлуб этди. Мутахассислар қозоғистонликка ғалаба қозониш учун 11 фоиздан кўп имконият беришмаганди, аммо Александр мўъжиза яратолди. У биринчи сетда 5:7 ҳисобида мағлуб бўлган бўлса, кейинги учта ўйинда ўз сервисида бирорта ҳам мағлуб бўлмади ва мос равишда 6:3, 6:2, 6:4 ҳисобида ғалаба қозонди.
Драперни мағлуб этганидан сўнг Бублик кўз ёшларини тия олмади.
«Биласизми, ҳаётда баъзида битта имконият берилади. Бу меники эканини билардим уни қўлдан бой бермаслигим керак эди. Бу ерда айни дамда ҳозир бўлиш — ҳаётимдаги энг яхши лаҳзадир. Мен шу ерда, худди кубок ютгандек турибман. Лекин бу ерда йиғлай олмайман. Ҳали олдинда ўйин бор, мен профессионал теннисчиман ва яхши тайёргарлик кўришим керак. Катта раҳмат, сизларга», — деди теннисчи кортда.
Бублик қозоғистонлик (эркаклар ўртасидаги яккалик баҳсларида) «Ролан Гаррос» чорак финалига чиқолган биринчи теннисчи бўлди.
Айни пайтда, у 2021 йили ушбу турнирнинг финалида ўйнаган, аммо жуфтлик баҳсларида.
Эслатиб ўтамиз, Бублик жорий «Ролан Гаррос»нинг 1/32 финалида ҳам дунёнинг 7-ракеткаси австралиялик Алекс де Минаурни 0:2 (2:6, 2:6, 6:4, 6:3, 6:2) ҳисобида мағлуб этганди.
ℹ️ Александр Бублик — Россия Федерациясининг Ленинград вилоятида туғилган. 2016 йилдан буён Қозоғистон терма жамоасида ўйнайди. У бир нечта АТП турнирлари ғолиби. У жуфтлик баҳсларида муваффақиятли иштирок этмоқда. Унинг энг юқори позицияси 17 (2024 йили).
