Жафар Паноҳи. "МК" сайти фотосурати
Эронлик режиссёр Жафар Паноҳининг «Оддий тасодиф» фильми 78-Канн кинофестивалининг бош соврини — «Олтин пальма япроғи»ни қўлга киритди.
Соврин учун йигирмадан ортиқ фильмлар, жумладан Сергей Лозницанинг «Икки прокурор», Ричард Линклейтернинг «Нувель ваг», Ари Астернинг «Эддингтон», Уэс Андерсоннинг «Финикия схемаси», Йоаким Триернинг «Сентиментал қиймат» ва бошқа фильмлар кураш олиб борган. Бироқ, Жюльет Бинош бошчилигидаги ҳакамлар ҳайъати «Олтин пальма япроғи»ни эронлик режиссёрга беришга қарор қилган. Жафар Паноҳи 15 йил ватанидан четга чиқарилмаган ва диссидент қарашлари учун икки марта қамоққа ташланган. У Эронни тарк этишга муваффақ бўлолган ва шахсан мукофотни олган.
«Оддий тасодиф» (Un simple accident фильмини триллер ва трагикомедия жанрида суратга олинган, деб баҳолайдилар. Сюжетга кўра, сўроқ пайтида одамларни қийноққа солган жаллодни унинг қурбонларидан бири таниб қолади. Қийноқлар одамларнинг кўзлари ёпиқ ҳолида содир этилган, аммо жаллодни протез оёғининг ғирчиллаши орқали таниб олишган. Ҳеч қандай хатолик йўқлигига ишонч ҳосил қилиш учун жабрланувчи ўзининг бир нечта танишларини терговга олиб келади. Аммо собиқ маҳбуслар ўртасида келишмовчиликлар юзага келади, уларда жаллодини жазолаш зарурати ҳақида шубҳалар пайдо бўлади.
Фильм сюжети қисман режиссёрнинг шахсий биографиясига асосланган. Фильм Эронда яширин, хонадон ва ҳовлида турган машина билан чекланган ҳолда суратга олинган.
ℹ️ Жафар Паноҳи Эроннинг энг машҳур режиссёрларидан бири ва Эрон киносининг «янги тўлқини» вакили ҳисобланади. Канндаги ғалаба орқали Паноҳи «Катта учлик» деб номланган барча асосий фестивалларнинг лауреати бўлди. Бундан олдин, 1995 йили у «Оқ шар» фильми учун Канн кинофестивалида дебютантлар учун бериладиган «Олтин камера» мукофотига сазовор бўлган, 1997 йили «Ойна» фильми учун Локарно кинофестивалида «Олтин леопард»ни, 2000 йили «Доира» фильми учун Венеция кинофестивалида «Олтин шер»ни, 2006 йили «Офсайд» фильми учун Берлиналеда «Кумуш айиқ» мукофотини қўлга киритган.
Ўз ватанида Паноҳи фильмлари цензура туфайли бир неча бор қисқартирилган ёки экранга чиқарилмаган ва режиссёрнинг ўзи икки марта қамоққа ташланган.
