"Аркадаг" ФК. the-afc сайти фотосурати
Туркманистоннинг «Аркадаг» футбол клуби ОФК Чақирув лигаси финалида Камбоджанинг «Свай Риенг» жамоасини 2:1 ҳисобида мағлуб этиб, турнир ғолибига айланди.
Ҳар икки жамоа ҳам кутилмаганда финалга йўл олди. «Аркадаг» ҳам, «Свай Риенг» ҳам ярим финалда нуфузлироқ рақибларини мағлуб этиб, мусобақанинг гуруҳ босқичида ютқазишганди. Туркманистонлик футболчилар Қувайтнинг «Ал-Араби»сини (0:2, 3:0), камбоджаликлар эса индонезияликларнинг «Мадура Юнайтед»ини (3:0, 3:3) мағлубиятга учратди.
Финал ўйини олдидан мутахассислар «Свай Риенг»га устунлик беришди, зеро унда бразилиялик легионерлар кўп эди ва ўйин Камбоджадаги стадионда бўлиб ўтаётганди. Шунга қарамай, туркман клуби хорижликларсиз ҳам натижага эришиш мумкинлигини яна бир бор исботлади.
Учрашув тенг курашлар остида кечди. 59-дақиқада «Аркадаг» футболчилари ҳисобни очишди. Шаназар Тиркишовнинг бурчакдан йўллаган тўпини Мердан Сапаров рақиб дарвозасига йўллади. Бироқ, 82-дақиқада камбоджаликлар ҳисобни тенглаштиришга муваффақ бўлишди ва учрашувни қўшимча вақтга йўллашди. Ғалаба голини 112-дақиқада Олтимурод Аннадурдиев киритди.
Тиркишов турнирнинг энг яхши футболчиси, Аннадурдиев эса 5 та гол билан энг яхши мерган деб топилди.
ℹ️ Чақирув лигаси ОФКдаги учинчи кучли клуб турнири ҳисобланади. Турнир янги, аммо 2005-2014 йиллари ўтказилган ОФК Президенти кубогининг қайта тикланган турнири деса ҳам бўлади.Қизиғи, сўнгги икки Президент кубогини ҳам Туркманистон клублари: «Балкан» ва МТТУ клублари қўлга киритган.
2024/2025 йилги Чақирув лигасида 20 та жамоа иштирок этади, гуруҳ босқичига эса Туркманистон, Қувайт, Ливан, Сурия, Бангладеш, Уммон, Малдив ороллари, Фаластин, Индонезия, Мьянма, Камбоджа, Тайван, Лаос ва Мўғулистон, шунингдек, Қирғизистон ва Афғонистон клубларидан ташқари Бутан ва Непал чемпионларининг ўзаро баҳсида ютган жамоа билан бирга 16 та клуб йўл олади.
