Курдистон ишчилар партияси (РКК) тарқатиб юборилгани ва Туркияга қарши қуролли курашни тугатганини расман эълон қилди, деб хабар берди курд телеканали Rudaw.
Қарор кучайтирилган хавфсизлик чоралари остида 5-7 май кунлари бўлиб ўтган 12 партия қурултойи якунлари бўйича қабул қилинган. Форумда РКК «халқимизни инкор этиш ва йўқ қилиш сиёсатини синдириб, курд муаммосини демократик сиёсат орқали ҳал қилиш даражасига етказиш» орқали «ўзининг тарихий миссиясини бажаргани» қайд этилган.
РКК баёнотида: «Халқимиз РККни тарқатиб юбориш ва қуролли курашни тугатиш қарорини ҳаммадан яхшироқ тушуниб, демократик жамият қуриш масъулиятини ўз зиммасига олишига тўлиқ ишончимиз комил» дейилган.
Партия эндиликда курашнинг сиёсий ва демократик усулларига ўтишни режалаштираётганини таъкидлайди. РКК халқаро ҳамжамиятни ёрдам беришга, Туркия ҳукуматини эса 1999 йилдан бери Туркия қамоқхонасида умрбод қамоқ жазосини ўтаётган партия етакчиси Абдулла Ўжаланга ҳуқуқий ва сиёсий кафолатлар беришга чақиради.
Аввалроқ, 27 февраль куни Ўжалан ўз сафдошларини партияни тарқатиб юборишга ва қуролли тўқнашувга барҳам беришга чақириб, «қуролли кураш ўз маъносини йўқотганини» ва «РКК давлат ва жамият билан интеграциялашуви зарурлигини» таъкидлаган эди. Икки қурултойдан сўнг партия аъзоларининг аксарияти тинч йўлни танлаш ва ўз-ўзини тарқатиб юборишни қўллаб-қувватлаган.
ℹ️ РКК 1978 йили ташкил топган ва 1984 йилдан буён курдлар ҳуқуқлари ва Туркия таркибида мухторият яратиш учун қуролли партизан курашини олиб бормоқда. Можаро йилларида, турли ҳисоб-китобларга кўра, 40 мингдан ортиқ одам ҳалок бўлган, уларнинг аксарияти РКК аъзолари бўлган.
