saudivisa.com сайти фотосурати
Саудия Арабистони ҳукумати кўплаб давлатлар, жумладан, Ўзбекистон ва Тожикистон фуқаролари учун электрон визалар берилишини тўхтатди. Бу ҳақда Яқин Шарқ қироллиги туризм вазирлигига асосланиб Kun.uz хабар берди.
Вазирлик бу чора вақтинчалик эканини таъкидлаган. Е-visa беришдаги тақиқ 23 апрелдан 9 июнгача, яъни Ҳаж (зиёрати) даврида давом этади. Бунинг сабаби шундаки, кўплаб диндорлар Умра зиёрати учун сайёҳлик визаси билан мамлакатга учиб келишади, кейин эса ҳаж давригача қолишади ва шу тариқа улар ҳар бир давлат учун белгиланган квоталар доирасидан ташқари муқаддас жойларни зиёрат қилишади.
Вазирлик вакилларининг аниқлик киритишича, зиёрат даврида ўзбекистонликлар ва тожикистонликлар Саудия Арабистонига виза олиш учун ўз мамлакатларидаги элчихоналар ёки бошқа ваколатли органлар орқали мурожаат қилишлари мумкин. Бундан ташқари, Шенген визаси эгалари, Европа Иттифоқи, Буюк Британия ва АҚШ резидентлари чегара назорат пунктларида қиролликка кириш учун рухсат олиш ҳуқуқига эга.
2023 йил август ойида Саудия Арабистони Ўзбекистон фуқаролари учун махсус портал орқали онлайн тарзда виза олиш имкониятини яратган эди. Бундай аризаларни 57 давлат вакиллари топширишлари мумкин бўлган. E-visa мамлакатда 90 кунгача бўлишга рухсат берган, аммо Ҳаж зиёратини адо этиш ёки қиролликда ишлаш ҳуқуқини бермаган.
Эслатиб ўтамиз, аввалроқ Саудия Арабистони ҳукумати Ҳаж зиёратига келувчи хорижликлар учун янги қоидалар жорий қилгани хабар қилинганди. Низомга кўра, улар 29 апрелдан бошлаб муқаддас қадамжоларга фақат зиёрат визаси бўлган тақдирдагина боришлари мумкин. Ушбу режимни бузиш жарима, олти ойга ҳибсга олиш ва ўн йилга мамлакатга кириш тақиқланган ҳолда депортация билан жазоланади.
ℹ️ 2025 йилги Ҳаж мавсуми май ойининг ўрталарида бошланиб, июнь ойининг охиригача давом этади. Бу сафар Саудия Арабистони Тожикистонга 7 минг, Ўзбекистонга 15 минг нафар Ҳаж учун квота ажратган. Бундан ташқари, Ўзбекистонда бундай фаолиятни амалга ошириш учун лицензияга эга бўлган атиги 12 туроператор тақводорларни Макка ва Мадинага жўнатиши мумкин.
Таъкидлаш жоиз, республикада фирибгарлар фаолият юритмоқда. «Фарғона» ноқонуний тур фирмалар қурбонига айланган 600 га яқин мусулмон ўз ватанига қайтарилгани ҳақида ёзган эди. Бундан ташқари, фирибгарлик йўли билан зиёратчиларни юборишни режалаштирган тўққизта компаниянинг эълонлари фош этилганди.
ℹ️ Қўшимча қилиш лозим, Саудия Арабистонининг электрон визалар берилишини тўхтатиб туриш ҳақидаги қарори БАА атрофидаги вазиятга ҳеч қандай алоқаси йўқ. Яқинда Амирлик расмийлари Ўзбекистон фуқаролари томонидан содир этилган ноқонуний хатти-ҳаракатлар сонининг кўпайиши икки давлат ўртасидаги визасиз режимга таъсир қилиши мумкинлиги ҳақида огоҳлантирган эди. Кейинроқ Ўзбекистон Ташқи ишлар вазирлиги бу маълумотни «фейк» деб атади ва визасиз режим ўз кучида қолганини таъкидлади.
