Қурбон Бердиев. "Рубин" матбуот хизмати фотосурати
Қозондаги «Ак Барс Арена» стадионидаги трибуналардан бирига туркманистонлик мураббий Қурбон Бердиев номи берилди. Мутахассис очилиш маросимига таклиф қилинди, деб хабар беради «Чемпионат».
Қозон клуби мухлислари ўртасида ўтказилган овоз бериш натижасида «Рубин» ФК уй стадиони жанубий трибуна секторига жамоа тарихидаги энг муваффақиятли мураббий шарафига ном бериш тўғрисида қарор қабул қилинди. Яна иккита сектор бошқа клуб афсоналари — Гёкдениз Карадениз ва Виктор Колотов шарафига номланди.
Айни дамда Озарбайжоннинг «Турон» клубига устозлик қилаётган Қурбон Бердиев ўзининг банд бўлишига қарамай, трибуналарнинг очилиш маросимида иштирок этиш ва мухлисларга миннатдорчилик билдириш, шунингдек, РПЛ доирасидаги «Рубин» – «Факел» (2:1) учрашувига ташриф буюриш учун Қозонга келди.
ℹ️ Қурбон Бердиев асли ашхободлик. Футболчи сифатида Ашхободнинг «Колхозчи» ва Олма-Отанинг «Қайрат» жамоаларида жуда муваффақиятли ўйнаган. 90-йиллари у икки марта Олма-Ота клубини бошқарган, Қозоғистон чемпионлигини қўлга киритган. Туркманистон терма жамоаси билан ишлаган. 2004 йилдан 2017 йилгача тўрт йиллик танаффус билан Қозоннинг «Рубин» клуби вице-президенти лавозимида ишлаган. Шунингдек, у «Рубин»ни бошқарган ва уни икки марта Россия чемпионатига олиб чиққан, бир марта кубок ва икки марта мамлакат Суперкубогини қўлга киритган. Бердиев бошчилигида илк бор «Ростов» Россия чемпионатининг кумуш медалини қўлга киритган ва Чемпионлар лигасининг гуруҳ босқичига йўл олган.
У 2021 йили «Қайрат»га Кузатув кенгаши раиси маслаҳатчиси сифатида қайтган, кейин эса жамоанинг асосий таркибини бошқарган. Унинг қўл остида «Қайрат» мамлакат кубогини қўлга киритди ва илк бор еврокубокларнинг гуруҳ босқичига йўл олди. Унинг қўл остида олмаоталиклар Қозоғистон чемпионатининг бронза медалини қўлга киритишди.
2022 йил июнь ойида мазкур клубни тарк этгач, у Эроннинг «Терактор Сази» клубини бошқарган ва у билан олти ойдан кам вақт ишлаган. 2022 йили декабрида «Сочи» ФК бош мураббийси этиб тайинланган, лекин шу йил апрель ойида мураббий билан тузилган шартнома бекор қилинган. Бердиев Махачқалъанинг «Динамо»сини қабул қилиб, у ерда 2024 йилнинг февралигача ишлаган ва «соғлиғи туфайли» жамоани тарк этганди. Бир неча ойдан сўнг у Озарбайжоннинг «Турон» жамоасини бошқарди.
