Рита Карасартова. super.kg сайти фотосурати
Қирғизистонлик ҳуқуқ ҳимоячиси Рита Карасартова тергов изоляторига (СИЗО) жўнатилди, у Бишкекнинг Свердловск туман суди қарори билан 12 майга қадар ҳибсда сақланади. Бу ҳақда Kloop.kg нашри хабар берди.
Карасартова Қирғизистон Жиноят кодексининг 278-моддаси 1-қисми («Оммавий тартибсизликлар») билан айбланган. Бишкек шаҳар суди ҳуқуқ ҳимоячиси «оммавий тартибсизликларга кўмаклашганлик»да гумон қилинаётганини тушунтирди.
16 апрелдан 17 апрелга ўтар кечаси туман судида бўлиб ўтган мажлисда ҳибсга олиш тўғрисида қарор қабул қилинган. Kloop.kg қайд этишича,
судя Қорасартованинг ҳибсга олинишини ноқонуний, аммо асосли деб топган.
Ҳуқуқ ҳимоячисининг адвокатларига кўра, мажлис қонунбузарликлар билан ўтган. Хусусан, судя ишни кўриб чиқишга қабул қилинганини тасдиқловчи процессуал ҳужжатларни тақдим этмаган ва ҳимоячининг илтимосига биноан таржимон бермаган. Адвокатларнинг Қарасартова айнан нимада айбланаётгани ва керакли экспертиза ўтказилганми ёки йўқлигига доир саволига терговчи «бу тергов сири» деган жавоб билан чекланган.
ℹ️ Рита Карасартова 14 апрелдан 15 апрелга ўтар кечаси уйида ўтказилган тинтувдан сўнг қўлга олинган. Ҳуқуқ ҳимоячиси сўроқ учун олиб кетилиб, вақтинчалик сақлаш ҳибсхонасига жойлаштирилган. Карасартова ўзининг ҳибсга олинишини фаол Тилекмат Куреновнинг ижтимоий тармоқларда эълон қилган мактуби билан боғлайди. Матн Куреновлар оиласига бағишланган ва анча вақт олдин ёзилган. Фаол ҳуқуқ ҳимоячисидан унга бирор нарса бўлган тақдирда мактубни чоп этишни сўраган. Фаолнинг яқинларига кўра, у 10 апрель куни Дубайда ғойиб бўлган, шундан сўнг Карасартова Facebook (РФда экстремистик деб тан олинган ва тақиқланган Meta корпорациясига тегишли тармоқ) даги саҳифасига мактубни жойлаган.
Халқаро инсон ҳуқуқлари ташкилотлари Human Rights Watch ва Amnesty International Қирғизистонни инсон ҳуқуқлари бўйича халқаро мажбуриятларини бажаришга ва Рита Карасартовани «зудлик билан ва сўзсиз» озод қилишга чақирган.
«Қирғизистон ҳукумати Рита Карасартова ҳибсга олинишининг аниқ ҳуқуқий асосларини зудлик билан оммага эълон қилиши лозим, унинг ҳуқуқлари тўлиқ ҳурмат қилинишини ва унга тегишли тиббий ёрдам олиш имкониятини таъминлаши керак. Агар у фақат сўз эркинлиги ҳуқуқидан фойдалангани учун ҳибсга олинган бўлса – шундайлиги кўриниб турибди — у дарҳол ва сўзсиз қўйиб юборилиши», — дейди Мари Стразерс, Amnesty International нинг Шарқий Европа ва Марказий Осиё бўйича директори.
