Ўзбекистон президенти матбуот хизмати фотосурати
Ўзбекистон Президенти Шавкат Мирзиёев 3 апрель куни Европа тикланиш ва тараққиёт банки раҳбари Одиль Рено-Бассо билан учрашди. Музокаралар «Марказий Осиё – Европа Иттифоқи» саммитининг ишбилармонлик дастури доирасида бўлиб ўтди, деб хабар қилади Ўзбекистон раҳбари матбуот хизмати.
Ўзбекистон ва EТТБ ўртасидаги стратегик шериклик муносабатларида юксак даражага эришилгани катта мамнуният билан қайд этилди. Устувор тармоқлардаги қўшма лойиҳалар портфели барқарор кенгайиб бормоқда. Банкнинг мамлакат иқтисодиётига киритган жами инвестициялари 5 миллиард евродан ошди, жумладан, ўтган йил якунларига кўра қарийб 1 миллиард еврони ташкил этди. Молиявий кўмакнинг асосий ҳажми хусусий секторга тўғри келмоқда.
Мамлакат бўйича ўрта муддатли Шериклик стратегияси самарали амалга оширилмоқда. EТТБ экспертлари кўмагида банк соҳасини трансформация қилиш ва бизнес учун имкониятларни кенгайтириш чоралари кўрилмоқда.
Мирзиёев ва Рено-Бассо кичик ва ўрта бизнесни ривожлантириш, аёллар ва ёшлар тадбиркорлигини қўллаб-қувватлаш, давлат-хусусий шериклик лойиҳаларини кучайтириш, хусусан, таълим, сув таъминоти, чиқиндиларни қайта ишлаш каби муҳим йўналишларда ҳамкорликни кенгайтириш масалаларини муҳокама қилдилар.
«Яшил» иқтисодиёт, углерод чиқиндиларини камайтириш, рақамлаштириш ва сунъий интеллект, ипотека бозори, транспорт коммуникацияларини ривожлантириш ва бошқа соҳалардаги дастур ва лойиҳалар ҳамкорликнинг устувор йўналишлари сифатида белгиланди.
Бундан ташқари, жорий йил июнь ойида Тошкент халқаро инвестиция форуми ва Хорижий инвесторлар кенгашининг навбатдаги йиғилишига тайёргарлик кўриш ва уларни ўтказиш юзасидан ҳам фикр алмашилди.
ℹ️ 3-4 апрель кунлари Самарқандда «Марказий Осиё-Европа Иттифоқи» нинг биринчи саммити бўлиб ўтади. Тадбирда Европа кенгаши президенти Антониу Коста, Европа комиссияси президенти Урсула фон дер Ляйен, Ўзбекистон президенти Шавкат Мирзиёев, Қозоғистон президенти Қосим-Жомарт Тўқаев, Қирғизистон президенти Садир Жапаров, Тожикистон ппрезиденти Эмомали Раҳмон ва Туркманистон президенти Сердар Бердимуҳамедов иштирок этади.
«Келажакга сармоя киритиш» шиори остида ўтказилаётган саммитда Европа тикланиш ва тараққиёт банки ва Европа инвестиция банки раҳбарлари ҳам иштирок этиши кутилмоқда. Мулоқотда минтақа давлатлари ва ЕИ ўртасидаги кўп қиррали муносабатлар ва амалий ҳамкорликни ривожлантириш истиқболлари кўриб чиқилади.
