Ўзбекистон президенти матбуот хизмати иллюстрацияси
Ўзбекистон Президенти Шавкат Мирзиёев 3-4 апрель кунлари Самарқандда бўлиб ўтадиган «Марказий Осиё – Европа Иттифоқи» саммити «тарихий аҳамият касб этиши»ни таъкидлади. Чунки, сиёсатчига кўра, биринчи марта минтақа давлатлари ва ЕИ раҳбарлари бир жойда учрашадилар. Мирзиёев Euronews телеканалига берган интервьюсида тадбирдан кўзланган мақсадлар билан ўртоқлашди.
Республика раҳбари саммит Марказий Осиё ва Европа Иттифоқи ўртасидаги муносабатларни ривожлантиришда муҳим босқич бўлиб, кейинги йилларда ўзаро ҳамкорлик сифат жиҳатидан янги босқичга кўтарилганини таъкидлади.
«Биз сиёсий мулоқотни чуқурлаштиришни ва ҳамкорлигимизни тизимлироқ ва узоқ муддатли мақсадларга йўналтириш имконини берадиган ўзаро ҳамкорликнинг янги механизмларини ишлаб чиқишни кутмоқдамиз», — деди президент.
Мирзиёев муҳим муҳокама йўналишларини белгилаб берди:
✅ иқтисодиёт;
✅ савдо;
✅ энергия;
✅ транспорт.
Ўзбекистон раҳбарининг сўзларига кўра, саммитнинг асосий натижаларидан бири томонларнинг стратегик шериклик муносабатларини ўрнатишга бўлган муштарак истагини акс эттирувчи Самарқанд декларациясининг имзоланиши бўлиши керак.
Мирзиёев европалик ҳамкорларга мурожаат қилар экан, Марказий Осиё ўзаро манфаат ва ишонч тамойилларига асосланган мулоқот ва ҳамкорликни кенгайтириш учун очиқ эканини таъкидлади.
Президент таъкидлашича, учрашув формати ўзаро ҳамкорликнинг ўзига хос ноёб ҳамкорлик платформаси бўлиб, ўлчам ва институционал қамров жиҳатидан унга ўхшаши мавжуд эмас.
«27 давлатни, жумладан «Катта еттилик»ка аъзо учта мамлакатни (Германия, Франция ва Италия) бирлаштирган Европа Иттифоқи Марказий Осиё билан минтақалараро даражада тизимли ҳамкорликни йўлга қўйган энг йирик интеграцион тузилма ҳисобланади. Европа Иттифоқи билан ҳамкорлик иқтисодиёт ва инвестициядан тортиб барқарор ривожланиш, хавфсизлик ва рақамли трансформациягача бўлган соҳаларнинг кенг мажмуасини қамраб олади ҳамда узоқ муддатли стратегик устувор йўналишларга асосланади», — деди Мирзиёев.
Мавзуни давом эттирар экан, сиёсатчи сўнгги етти йил ичида Марказий Осиё давлатлари ва ЕИ ўртасидаги товар айирбошлаш ҳажми тўрт баробар ўсиб, 54 миллиард еврога етган статистик маълумотларни келтирди. Шу билан бирга, Европа ишбилармонлари томонидан Ўзбекистон ва минтақанинг бошқа давлатлари билан савдо ва сармоявий шериклик имкониятларига қизиқиш билдирилмоқда.
Республика Президенти Самарқанднинг бундай кенг кўламли тадбир ўтказиладиган жойга айлангани бежиз эмаслигини қўшимча қилди. Зеро, бу шаҳар асрлар давомида савдо, илм-фан ва дипломатия маркази бўлиб, унинг буюклиги маданиятлар, халқлар ва ғояларни бирлаштириш қобилиятига асосланади.
«Олти асрдан ортиқ вақт илгари айни шу ердан Мовароуннаҳр ҳукмдори Амир Темур Европа монархлари билан эркин ва хавфсиз савдони таъминлаш мақсадида фаол алоқалар ўрнатган эди. <…> Тарихан шаклланган тушунчага кўра, Самарқанддан туриб қаралганда, дунё тарқоқ эмас, балки яхлит ва бўлинмас бўлиб кўринади. «Самарқанд руҳи» деган ноёб феноменнинг мазмуни ҳам асли шунда мужассам бўлиб, у халқаро ҳамкорликнинг принципиал жиҳатдан янги форматини шакллантириш учун асос бўлиб хизмат қилмоқда», — дея хулоса қилди Мирзиёев.
ℹ️ 3-4 апрель кунлари Самарқандда «Марказий Осиё-Европа Иттифоқи» нинг биринчи саммити бўлиб ўтади. Тадбирда Европа кенгаши президенти Антониу Коста, Европа комиссияси президенти Урсула фон дер Ляйен, Ўзбекистон президенти Шавкат Мирзиёев, Қозоғистон президенти Қосим-Жомарт Тўқаев, Қирғизистон президенти Садир Жапаров, Тожикистон ппрезиденти Эмомали Раҳмон ва Туркманистон президенти Сердар Бердимуҳамедов иштирок этади.
«Келажакга сармоя киритиш» шиори остида ўтказилаётган саммитда Европа тикланиш ва тараққиёт банки ва Европа инвестиция банки раҳбарлари ҳам иштирок этиши кутилмоқда. Мулоқотда минтақа давлатлари ва ЕИ ўртасидаги кўп қиррали муносабатлар ва амалий ҳамкорликни ривожлантириш истиқболлари кўриб чиқилади.
