cumhuriyet.com сайти фотосурати
Радио ва Телевидение Олий Кенгаши (RTÜK) раиси Абу Бакр Шаҳин полицияни огоҳлантирмаган ҳолда берилган жонли эфирлар «жамиятда нафрат уйғотиши» ва шунинг учун конституцияга кўра тақиқланиши кераклигини айтди. Бу ҳақда Haberler хабар берди.
Мамлакатнинг амалдаги президенти Ражаб Тоййиб Эрдўғоннинг асосий рақиби, ҳозирда Истанбулнинг собиқ ҳокими Экрем Имомўғлининг ҳибсга олиниши фонида ўтказилаётган норозилик намойишларини жонли эфирда кўрсатаётган Туркия телеканаллари огоҳлантирилди.
«Биламан, биз бу борада жуда кўп танқидларга дуч келяпмиз, лекин жамиятда нафрат ва ғазаб қўзғатаётган телеканалларимизни, айниқса, асосли баёнотлари билан жамиятимизни тинчлантириши керак бўлган ва буни қилмаётган одамларни огоҳлантиришимиз керак эмасмиди. Аммо улар ҳуқуқ-тартиботни сақлашга уринаётган полициямиз ва ҳуқуқ-тартибот идораларига қилинган ҳужумларни жонли эфирда намойиш этишмоқда». — деди Шаҳин.
У Туркия ва RTÜK аввалгидек эмаслигини таъкидлаб ўтди, бироқ у трансляцияни тақиқлашни цензура деб ҳисобламайди.
«Ҳеч ким хафа бўлмасин, бундай арзон найранглардан тўйганмиз. Биз Конституциямиз, қонунларимиз ва мавжуд шароит талаблари, бизга берилган ваколатлар асосида текширувларимизни давом эттирамиз. Тўғридан-тўғри ва аниқ айтаман: бошқа огоҳлантиришлар бўлмайди. Сўзлар тугади, энди кенгаш қарорлари ва кенгашга тақдим этиладиган ҳисоботларни муҳокама қиламиз», — деди у.
Ўз навбатида, асосий мухолифат партияси – Халқ республика партияси (ХРП) етакчиси Ўзгур Ўзел тарафдорларини ҳар куни норозилик намойишларига чиқишга, шунингдек, митинглар ва намойишчиларни полиция томонидан шафқатсизларча тарқатиб юборишига эътибор бермаётган ОАВни бойкот қилишга чақирди.
24 март куни эрталаб Истанбул ва Измирда фуқаролар, жумладан журналистлар ва сиёсатчилар уйларида рейд ва тинтувлар ўтказилди. «Мажлислар ва намойишлар тўғрисида»ги қонунни бузгани учун бир неча киши, жумладан, оммавий ахборот воситалари ходимлари ва баёнот тарқатган Коммунистик партиянинг уч нафар вакили қўлга олинди.
«Сиёсий нуқтаи назарини қонуний ва тинч йўл билан ифода этган шахсларнинг сохта асослар билан ҳибсга олинаётгани мамлакатнинг амалдаги ҳукумати қанчалик қийин аҳволда эканидан далолатдир. Реакцион режим парчаланмоқда. Улар бир ҳовуч озчилик, бизлар эса миллионлаб одамлармиз. Эркинликлари ноҳақ ҳибс билан чекланган барча фуқаролар зудлик билан озод этилиши керак», — дейилади Коммунистик партия баёнотида.
Ўз навбатида Истанбул губернатори Довут Гул полицияга «тош, петарда ва шунга ўхшаш нарсалар» билан ҳужум қилаётганлар қўлга олинаётганини айтди. Гул вайрон қилинган қабристонлар фотосуратларини кўрсатди.
«Масжид ва қабристонларга зарар етказиш халқ муқаддас қадриятларига қарши очиқ провокациядир. Бу қабиҳ ишларни қилганлар ўзларига яраша жазосини оладилар. Фуқароларимиздан одамлар ниқоб кийган жойлардан узоқроқ туришларини ва рухсат этилмаган намойишларда қатнашмасликларини сўраймиз. Жамоат тартибини ҳар қандай йўл билан бузишга уринишлар қабул қилиниши мумкин эмас», — деб ёзган Гул ижтимоий тармоқларда.
ℹ️ Экрем Имомўғли 19 март куни коррупцияда айбланиб ушланган, кейин ҳибсга олинган. Бир неча кундан сўнг ИИВ унинг Истанбул мэри лавозимидан айрилганини маълум қилди. Имомўғли ҳибсга олинганидан сўнг дарҳол Туркияда машҳур ижтимоий тармоқларга кириш чекланди, Истанбулда намойиш ва митингларга вақтинчалик тақиқ жорий этилди, бир қанча метро бекати ва магистрал йўллар ёпилди.
23 март куни бўлиб ўтган ХРП қурултойида Экрем Имомўғли Туркия президентлигига мухолифатдан номзод сифатига илгари сурилганди.
Ўзгур Ўзелга кўра, унга 1,653 миллион партия аъзоси овоз берган.
«Бу ҳозирги давлат тўнтаришига бўлган уринишга берилган қатъий жавобдир. Шунингдек, биз фуқароларга бирдамлик урналарига келиб, овоз беришни таклиф қилдик. Улардан бўлажак президент Экрем учун 13,21 миллион овоз олдик. Унга жами 14,85 миллиондан ортиқ киши овоз берди», — деди Ўзел.
Шунингдек, Шишли шаҳар ҳокимлиги раиси Расул Эмраҳ Шаҳан, Ислоҳот институти директори Меҳмет Али Чалишкан ва Истанбул муниципалитети бош котиби ўринбосари Маҳир Пўлат ҳам қуролли террор ташкилотига ёрдам берганликда гумонланиб ҳибсга олинган.
Ҳукуматнинг бундай ҳаракатлари мамлакатнинг кўплаб шаҳарларида жамоатчиликнинг, шу жумладан талабаларнинг кескин норозилигига сабаб бўлди. Полиция махсус воситалар, жумладан резина ўқлар ёрдамида митингларни тарқата бошлади. Марказий ОАВ ўн минглаб фуқаролар йиғилган Сарачхон майдонидан жонли эфирни кўрсатди, бироқ кейин уни тўхтатди.
