e-cis.info сайти фотосурати
Ўзбекистон ҳукумати хорижий экспертлар иштирокида кичик ва ўрта бизнесни ривожлантириш бўйича кенг кўламли дастур ишлаб чиқди. 2025 йили ушбу мақсадлар учун рекорд даражадаги 120 триллион сўм (9,3 миллиард доллар) йўналтирилади. Бу ҳақда мамлакат президенти Шавкат Мирзиёев маълум қилди, деб хабар беради унинг матбуот хизмати.
Давлат раҳбари тадбиркорлик субъектларига молиявий ёрдам кўрсатиш масаласига тўхталар экан, бундай йирик сумма йўналтирилиши илгари ҳеч қачон бўлмаганини алоҳида таъкидлади. Президент маълумотларига кўра, аҳолини ўз бизнесини йўлга қўйишга жалб этиш учун 22 триллион сўм (1,7 миллиард доллар) йўналтирилади, шундан 2,5 триллион (193,6 миллион доллар) ёшлар ва аёллар тадбиркорлиги лойиҳаларини қўллаб-қувватлашга сарфланади. Бундан ташқари, аёллар учун имтиёзли кредитлар бўйича фоиз ставкаси бошқаларникига қараганда 2 фоизга паст бўлади.
Бундан ташқари, банкларга ўтган йили кичик ёки ўрта тадбиркорликни рўйхатдан ўтказган фуқароларга 150 миллион сўм (11,6 минг доллар)гача бўлган гаровсиз кредитлар бериш бўйича кўрсатмалар берилди. Худди шундай, оилавий тадбиркорлик бўйича ҳам 50 миллион сўмгача (тахминан 3,9 минг доллар) гаровсиз кредит берилади.
Шунингдек, мутасаддиларга олдинги кредитидан кечиккан қарзи бўлмаган тадбиркорларга янги имтиёзли кредит олиш имконини яратиш топширилди.
Президент жорий йили мақсад ва вазифалар қаторида қуйидагиларни белгилаб берди:
👉 кичик ва ўрта бизнеснинг иқтисодиётдаги улушини 55 фоизга кўтариб, 70 миллиард долларлик қўшилган қиймат яратиш;
👉 тадбиркорларга янги бозорларга чиқишда транспорт, сертификатлаштириш ва стандартлар бўйича ёрдам бериш;
👉 кичик бизнес субъектлари экспортини 9 миллиард доллардан 12 миллиард долларгача оширишга эришиш;
👉 ичимлик суви, канализация, йўл, қурилиш, коммунал хўжалик, етказиб бериш, утилизация, миграция, маданият ва ижтимоий хизматларда кичик бизнес улушини 2-3 карра ошириш;
👉 1,5 миллион доимий иш ўрни яратиш;
👉 100 дан ортиқ ходимга эга корхоналар сонини 4 мингтага етказиш;
👉 200 та стартап лойиҳаларни молиявий қўллаб-қувватлаш.
Мирзиёев бу борада амалга оширилган ишлар ҳақида гапираркан, сўнгги пайтларда кичик ва ўрта бизнес янги иш ўринлари яратиш, сармояларни жалб қилиш, инновацияларни ривожлантириш, рақобат, қўшимча қиймат ва экспортни оширишнинг драйверига айланганини таъкидлади. Унга кўра, беш йил ичида тадбиркорлик субъектлари сони икки баравар кўпайиб, 10 миллиондан ортиқ аҳоли барқарор даромад олмоқда. Иқтисодиётнинг ярмидан кўпи, саноат ишлаб чиқариш ва экспортнинг учдан бир қисми ушбу тармоқ ҳиссасига тўғри келади.
«Ўзгаришларга тез мослашадиган, янгилик ва рақобатдан қўрқмайдиган, муҳими, одамларни ишли қилиб, даромадини кўпайтиришда энг фаол соҳа ҳам бу – кичик бизнес. Шу боис, кичик бизнесни қўллаб-қувватлаш бундан кейин ҳам давлат сиёсатининг устувор йўналишларидан бири бўлиб қолади», — деди президент.
