mvd.gov.kg сайти фотосурати
Қирғизистон Ички ишлар вазирлиги оммавий тартибсизликларни уюштирганликда гумон қилинган бир гуруҳ шахсларни, жумладан улар орасида Жогорку Кенеш (Қирғизистон парламенти) собиқ депутати ҳам ҳибсга олинганини маълум қилди. 24.Kgънинг ҳуқуқ-тартибот идораларидаги манбасига кўра, қўлга олинган собиқ депутат 64 ёшли Бакит Керимбековдир.
Тезкор маълумотларга кўра, «Кырк уруу жети дубан ынтымагы» жамоат бирлашмаси аъзолари мунтазам равишда йиғилишлар ўтказиб, фуқароларни ўзлари режалаштирган талончилик ва мол-мулкни йўқ қилишда иштирок этишга чақирган.
Гумонланаётган шахслар 24 февраль куни ИИВ Тергов хизмати ходимлари томонидан уларнинг уйларида ўтказилган тинтувлар натижасида қўлга олинган. Хавфсизлик кучлари томонидан граната, арраланган ов милтиғи, тўппонча, ўқ-дорилар, камуфляж кийимлари, гиёҳвандлик воситалари, диний адабиётлар, махсус ниқоблар, оммавий тартибсизликларни ташкил этиш бўйича йўриқномалар, пичоқли қуроллар, давлат рақамлари, мобил телефонлар ва флеш-дисклар каби турли ашёлар олиб қўйилган.
Мазкур ҳолат юзасидан Қирғизистон Жиноят кодексининг 278-моддаси («Зўравонликка йўғрилган оммавий тартибсизликларни уюштириш») билан жиноят иши қўзғатилган. Барча ҳибсга олинганлар вақтинчалик сақлаш ҳибсхонасига жойлаштирилган.
ℹ️ Аввалроқ хавфсизлик кучлари Қирғизистонда давлат тўнтаришига уринишлар ва оммавий тартибсизликлар олди олингани ҳақида бир неча бор хабар берган эди. Масалан, 2024 йил ноябрь ойида ИИВ ходимлари Қирғизистонда ҳокимиятни зўравонлик йўли билан эгаллаб олишга уринганликда гумон қилинган олти кишини қўлга олганди. Давлат тўнтаришига уриниш ташкилотчиси бош прокурорнинг собиқ ўринбосари Кубан Адил уулу ҳисобланади, у ҳам ҳибсга олинган. Гумонланувчилардан қурол-яроғ, ўқ-дорилар, гиёҳвандлик воситалари, мингдан ортиқ шиша спиртли ичимликлар, озиқ-овқат маҳсулотлари ва тартибсизликлар уюштиришга мўлжалланган бошқа жиҳозлар мусодара қилинган. 2024 йил июль ойида хавфсизлик кучлари Қирғизистон Мустақиллик куни нишонланадиган 31 августга режалаштирилган ҳокимиятни куч билан эгаллаб олишга уринишнинг олди олингани ҳақида хабар берганди.
