Бекзат Абдинасир уулу. ТАСС фотосурати
Москва шаҳридаги Иккинчи Ғарбий округ ҳарбий суди 30 ёшли Қирғизистон фуқароси Бекзат Абдинасир уулини «Крокус сити холл» концерт залида теракт уюштирган жиноятчиларни оқлашда айбдор деб топди. 19 февраль куни мигрант 3 йиллик қамоқ жазосига ҳукм қилинди, деб хабар беради ТАСС.
2024 йил апрель ойи бошида Абдинасир уулу «Мигранты.ру» Телеграм-каналида террорчиларнинг биринчи сўроқлари акс этган видео остида қуйидаги изоҳни қолдирган: «Зўр йигитлар, бундай ҳаракат қилиш учун юрак керак, афсус қўлга тушиб қолишди».
Бекзат 8 ноябрь куни қўлга олиниб, Москвадаги 4-сонли тергов изоляторига жўнатилган. У Росфинмониторинг экстремистлар ва террорчилар рўйхатига киритилган. Текширув давомида қирғизистонлик Россияда «миграция қонунчилигини бузган ҳолда» яшагани аниқланган. У «Атриум» компаниясида ишлаган, ҳукм чиқкрилган пайтда ишсиз бўлган. Суд-тиббиёт экспертизаси унинг индивидуал психологик хусусиятларга эга эканини аниқлаган, бироқ экспертлар бу ҳолат жиноят содир этиш вақтида унга таъсир ўтказмаганини қайд этган.
Судда Бекзатга таржимон керак бўлган. Айбланувчи ўз айбига тўлиқ иқрор бўлган, тергов ишларига ёрдам берган ва қилмишидан пушаймон бўлган, бу эса жазони енгиллаштирувчи ҳолат сифатида ҳисобга олинган. Томонлар ўртасидаги баҳс-мунозарада прокурор уни тўрт йилга озодликдан маҳрум этишни сўраган. Суд айбланувчининг ҳибсда ўтказган вақтини инобатга олган ва якунда унинг уч йил муддатга умумий режимдаги колонияда жазо ўташига оид ҳукм чиқарган.
Бундан ташқари, суд Абдинасир уулуга икки йил муддатга веб-сайтларни бошқаришни тақиқлаган, мобил телефонини давлат фойдасига мусодара қилган ва sim-картасини йўқ қилишни буюрган. Ҳукм ҳали қонуний кучга кирмаган ва шикоят қилиниши мумкин.
👉 Бундан бир ҳафта олдин, 12 февралда худди шундай иш бўйича Приморье суди маҳаллий гуруҳ чатида 2024 йил март ойида «Крокус»да содир этилган теракт бўйича «терроризм мафкураси ва амалиётини оқлаш»ни ўз ичига олган пост жойлаган аёлни 320 минг рубл миқдорида жаримага тортган.
ℹ️ 2024 йил 22 март куни Москва вилоятининг Красногорск шаҳридаги «Крокус Сити Холл» концерт залида теракт «Пикник» рок гуруҳи чиқиши олдидан содир бўлганди. Камуфляждаги бир неча қуролланган киши мажмуага кириб, одамларга қарата ўқ ота бошлаган. Улар концерт залига кириб, ўт қўйишган. Ёнғин бинонинг тўрт қавати ва томини қамраб олган, шундан сўнг улар ўзлари келган машинада қочиб кетишган. Теракт 145 кишининг ҳаётига зомин бўлди.
Теракт иши бўйича 27 киши жиноий жавобгарликка тортилган. Жумладан, тўрт нафар ҳужумчи, уларга машина сотган уч киши ва террорчиларга квартирани ижарага берган ёки уларга пул ўтказмаларини юборган одамлар. Ишда 1700 дан ортиқ жабрланувчи ва 800 гувоҳ иштирок этмоқда.
Ҳужум учун жавобгарликни «Ислом давлати»нинг Афғонистондаги бўлими (ИШИД Хуросон, Вилоят Хуросон, ISIS-K номи билан ҳам танилган) ўз зиммасига олди. Ушбу ташкилот РФ ва бошқа кўплаб мамлакатларда террорчи сифатида тан олинган ва тақиқланган.
